Aqmola oblysynda repressııa qurbany Haıretdın Bolǵanbaev týraly kitap shyqty

KÓKShETAÝ. QazAqparat – Aqmola oblysynda saıası qýǵyn-súrgin qurbany Haıretdın Bolǵanbaev týraly «Haıretdın Bolǵanbaev – óshpes juldyz sáýlesi» atty kitaptyń tusaýkeseri ótti, dep habarlaıdy QazAqparat tilshisi.

Oblystyq Іshki saıasat basqarmasynan málim etkendeı, Qorǵaljyn aýdandyq kitaphanasynyń kovorkıng-ortalyǵynda ótken sharaǵa aýdan ákimi Berik Janbaev, jergilikti zııaly qaýym ókilderi, tarıhshylar, sondaı-aq saıası qýǵyn-súrgin qurbany Haıretdın Bolǵanbaevtyń nemeresi Dostyq Tuıaquly Kamelov qatysty.

Atalmysh kitap Alash qozǵalysy men «Alash» partııasy kóshbasshylarynyń biri, Túrkistan avtonomııasyn qurýǵa, qazaq jerlerin biriktirýge belsendi qatysqan kórnekti ári talantty memleket jáne qoǵam qaıratkeri, pýblıtsıst-aǵartýshy Haıretdın Ábdirahmanuly Bolǵanbaevqa arnalǵan.

Kitaptyń avtory ekonomıst-saıasattanýshy, Haıretdın Bolǵanbaevtyń nemeresi – Kamelov Dostyq Tuıaquly atasynyń qıyn taǵdyry týraly baıandap, tarıhı qujattarmen tanystyrdy.

Kitapta «Alash» qozǵalysynyń kórnekti ókili, túrki halyqtarynyń bostandyǵy men birligi úshin kúresken Haıretdın Ábdirahmanuly Bolǵanbaevtyń ómiri týraly aıtylady. Sondaı-aq onda QR Ulttyq qaýipsizdik komıtetiniń muraǵat qorlarynan tabylǵan túpnusqa qujattyq materıaldar usynylǵan.