Aqmola oblysynda ónimderdiń qaýipsizdigine monıtorıng júrgizildi
Aqmola oblysy sanıtarlyq-epıdemıologııalyq baqylaý departamenti baspasóz qyzmetiniń málimetinshe, bıylǵy jyldyń eki aıynda óńirdiń sanıtarlyq dárigerleri 507 ónim úlgisin iriktep teksergen. Bul rette sáıkessizdik 41 synamada (8,1 paıyz) anyqtaldy.
«Tehnıkalyq reglamentterdiń talaptaryn qamtamasyz etý boıynsha negizgi zań buzýshylyqtar ónimdi tańbalaýǵa qatysty 28 synamada (68,3 paıyz) anyqtalyp otyr. Sonymen birge, mıkrobıologııalyq kórsetkishter boıynsha - 6 synamada (14,6 paıyz), fızıkalyq-hımııalyq kórsetkishter boıynsha - 5 synamada (12,2 paıyz), qaýipsizdik kórsetkishteri boıynsha - 2 synamada (4,9 paıyz) sáıkessizdik tabyldy», - dep atap ótti vedomstvodan.
Aqmola oblysynyń ishki naryǵynda aınalymda júrgen ónimderde anyqtalǵan sáıkessizdiktiń 68,2 paıyzy ımportqa, 31,7 paıyzy otandyq ónimderge tıesili.
«Tamaq ónimderi úlgileriniń 282 synamasy alyndy, onyń ishinde sáıkessizdikter 19 synamada anyqtaldy, sáıkessizdikter paıyzy 6,7 paıyzdy qurady. Jeti synama (36,8 paıyz) ónimdi tańbalaý boıynsha talaptarǵa sáıkes kelmedi (oqylmaıtyn mátin, tamaq ónimderin saqtaý sharttary, paıdalaný boıynsha usynystar men shekteýler, taǵamdyq qundylyq kórsetkishteri, tamaq ónimderiniń quramy, biryńǵaı aınalym belgisi, orys jáne memlekettik tildegi aqparat), sondaı-aq, alty synama (31,5 paıyz) mıkrobıologııalyq zertteýler boıynsha (BGKP, MAFAM), bir synama (5,3 paıyz) qaýipsizdik kórsetkishteri (jaramdylyq merzimi ótken), bes synama (26,3 paıyz) fızıkalyq-hımııalyq kórsetkishter boıynsha (sút maıynyń, maı qyshqyldarynyń, metıl efırleriniń araqatynasy, ylǵaldyń massalyq úlesi, quramdas bólikterdiń massalyq úlesi; qurǵaq maısyzdandyrylǵan sút qaldyǵy) sáıkes kelmedi», - dep túsindirdi vedomstvodan.
Óńirdiń sanıtarlyq dárigerleri atap ótkendeı, kásipkerlik sýbektilerine qatysty anyqtalǵan zań buzýshylyqtardyń barlyq jaǵdaılary boıynsha halyqtyń sanıtarlyq-epıdemıologııalyq salaýattylyǵy salasyndaǵy Qazaqstan Respýblıkasy zańnamasynyń talaptaryn buzýshylyqtardy joıý týraly 15 sanıtarlyq uıǵarym berildi. Buǵan deıin aıtylǵandaı, Qazaqstanda tamaq ónimderiniń sapasy men qaýipsizdigin baqylaýdy kúsheıtý kózdelgen.