Aqmola oblysynda oblystyq ákeler forýmy ótti

KÓKShETAÝ. QazAqparat - Aqmola oblysynda «Ulttyq kodty saqtaýdaǵy ata-ananyń róli» atty ekinshi oblystyq ákeler forýmy ótti, dep habarlaıdy QazAqparat tilshisi oblystyq Іshki saıasat basqarmasyna silteme jasap.

Sharany «Rýhanı jańǵyrý» baǵdarlamasyn júzege asyrý sheńberinde «Shańyraq» áleýmettik-psıhologııalyq jáne zertteý ortalyǵy» qoǵamdyq qory uıymdastyrdy.

Aqmola oblysy ishki saıasat basqarmasy men Aqmola oblysy ákimi janyndaǵy Áıelder isteri jáne otbasylyq-demografııalyq saıasat jónindegi komıssııanyń qoldaýymen Şýchınsk qalasynda ótkizilgen sharanyń maqsaty otbasylyq qundylyqtardy saqtaýǵa baǵyttalǵan.

"Ákeler odaǵynyń mańyzdy mindetteriniń biri - ákelerdiń nazaryn óz balalaryn tárbıeleýge aýdarý, sondaı-aq qazaqstandyq qoǵamnyń nazaryn otbasynyń basty, ózekti tiregi retinde ákelik ınstıtýtqa qurmetpen qaraýǵa aýdarý. Memleket basshysy N.Nazarbaevtyń «Uly dalanyń jeti qyry» atty maqalasy  aıasynda Uly dalanyń kórnekti tulǵalarynyń erlikteri negizinde jastarǵa patrıottyq rýhty tárbıeleýge basa nazar aýdarý qajet, - dep atap ótti forýmda sóılegen sózinde Aqmola oblysy ishki saıasat basqarmasynyń basshysy, Aqmola oblysy ákiminiń janyndaǵy Áıelder isteri jáne otbasylyq-demografııalyq saıasat jónindegi komıssııa tóraǵasynyń orynbasary Gúljanar Shókeeva.

Plenarlyq otyrys eki sessııada ótkizildi, olardyń árqaısysy forýmǵa qatysýshylar úshin jas urpaqty tárbıeleýdegi áke ınstıtýtynyń róli týraly qyzyqty jáne paıdaly aqparatqa toly boldy.

Oblys aýdandary men qalalarynyń ákeler keńesiniń ókilderi úshin «Otbasy tárbıesindegi ákeler rólin joǵarylatý» taqyrybynda semınar-trenıng ótkizildi.

Sharada «Ákem - maqtanyshym, júregim, jandosym, Anam - súıenishim, qosshynarym» atty úzdik shyǵarma oblystyq baıqaýynyń jeńimpazdary anyqtalyp, olarǵa syı-syıapat kórsetildi. Sondaı-aq, Aqmola oblysynyń úlgili ákeleri «Qamqor Áke» medaldarymen jáne «Qadirli Áke» gramotalarymen marapattaldy.