Aqmola oblysynda Naýryz meıramy sheńberinde 1 myńnan astam shara ótedi

KÓKShETAÝ. QazAqparat - Ulystyń uly kúni – Naýryz meıramyn merekeleý sheńberinde Aqmola oblysynda 1 myńnan astam merekelik is-shara ótkiziledi, dep habarlaıdy QazAqparat tilshisi.

Aqmola oblystyq Iádenıet, arhıvter jáne qujattamalar basqarmasy baspasóz qyzmetiniń málimetinshe, 13-23 naýryz aralyǵynda Aqmola oblysynda kóne salt-dástúrlerdiń tarıhı rekonstrýktsııasyn, «Naýryz kóje», otbasylyq ansamblder, ulttyq aspaptar tárizdi festıvalderdi, «Kelinder», «Ájeler» baıqaýlaryn, kóshpeli qaıyrymdylyq kontsertterin, aktsııalardy, balalar shyǵarmashylyǵy is-sharalaryn, «Bata» baıqaýlaryn, ulttyq taǵamdar, oıý-órnekter, ulttyq kıimder chellendjderin ótkizý josparlanǵan.

«Naýryz meıramyn toılaýdyń on kúndigi 13 naýryz kúni «RIO» saýda, oıyn-saýyq ortalyǵynda ınteraktıvti merekelik baǵdarlamamen ashyldy. Baǵdarlamaǵa «Kókshetaý» mádenıet saraıynyń shyǵarmashylyq ujymdary qatysty. Aqmolalyqtar «Kerbez sulý» halyqtyq folklorlyq ansambli (jetekshisi Dáýren Birjanov), «Kórkemtaý» dombyrashylar ansambli (jetekshisi Qaırat Nurmuqanov), halyqtyq ardagerler horynyń vokaldyq toby (jetekshisi Svetlana Pýshkına), «Shamshyraq» estradalyq vokal stýdııasynyń solısteri Dılnaz Malıkova jáne Araı Negımedjanova (jetekshisi Marına Daýtova), «Shalqyma» halyqtyq bı ansambli (jetekshisi Aıdana Battalova), vokaldyq kvartet (jetekshisi QR eńbek sińirgen ártisi Bısara Mákenova), saksofonshy Vadım Belyı, dástúrli ánshi Tólegen Amanovtyń ónerin tamashalady», - dedi vedomstvodan.

Shara sheńberinde saýda ortalyqtaryna kelýshilerge merekelik kóńil-kúımen qatar qazaqtyń ulttyq taǵamy – baýyrsaq úlestirildi.