Aqmola oblysynda myńdaǵan kıik egindi taptap júr
Beınejazbadan myńdaǵan jabaıy kıiktiń jańa ǵana shyǵa bastaǵan egin alqabynda jaıylyp júrgenin kórýge bolady. Turǵyndar ańdy avtokólikpen qýyp álek.
«Jyldan-jylǵa kıikterdiń sany artyp keledi. Janýarlardyń erkinsigeni sonshalyqty, bizdiń nanymyzdy tartyp jeı bastady. Tipti, adamdan, mashınadan, eshteńeden qoryqpaıdy! Birneshe jyldan beri osyndaı jaǵdaı. Eginimizdi otap tastaıdy. Biz eshteńe jasaı almaımyz, óıtkeni olar Qyzyl kitapqa engizilgen», - deıdi beınejazba avtory.
Tuıaqty janýar sharýa qojalyqtarynyń eginimen birge, shabyndyǵyn da taptap, aýyl sharýashylyǵyna orasan zııan keltirip jatyr.
«Nesıege tehnıka satyp alyp, shamaly ǵana jerimizge egin egip, jan baǵyp otyrǵan jandarmyz. Al, myna kıikterdiń sanynda shek joq, kóbeıip barady. Sol eginimizge túsip, qorlyqtyń kókesin kórsetip otyr. Keshe 2-3 myń kıikti egistikten qýyp shyqtym. Tipti, keıbir úıirlerde kıik sany 30-40 myńǵa deıin jetedi. Úkimetten myna kıikter máselesin bir jaǵyna shyǵaryp, sheshimin tabýdy suraımyz. Egin egemiz be, álde kıik baǵamyz ba?» - deıdi Esengeldi aýylynyń turǵyny Nurbaı Júsipov.
Osy rette, QazAqparat tilshisi óńirdegi kıikterdiń popýlıatsııasy týraly málimet alý úshin Aqmola oblysy boıynsha orman sharýashylyǵy jáne janýarlar dúnıesi aýmaqtyq ınspektsııasyna saýal joldaǵan edi. Inspektsııa mamandary ázirge jaýap bermedi.
Eske salsaq, Qazaqstanda kıikterdiń sanyn anyqtaý jáne baqylaý jumystary júrip jatyr. Bul týraly QR Ekologııa, geologııa jáne tabıǵı resýrstar mınıstri Serikqalı Brekeshev Úkimette aıtqan edi.
Sondaı-aq, BQO ákimi sharýalar múddesin qorǵaý úshin kıiktiń sanyn retteý qajettigi týraly másele kótergen bolatyn.