Aqmola oblysynda «Merıdıan» Halyqaralyq armııa oıyndarynyń baıqaýy bastaldy

KÓKShETAÝ. QazAqparat - Aqmola oblysynyń Şýchınsk qalasynda Halyqaralyq armııa oıyndary aıasynda topogeodezııalyq eseptoptar arasynda ótetin jarystyń jerebe tastaý rásimi ótti, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Onyń nátıjeleri boıynsha komandalar mynadaı tártippen óner kórsetedi: Vetnam, Ózbekstan, Qytaı, Belarýs, Reseı, Armenııa jáne Qazaqstan. Venesýela bul saıystyń baqylaýshysy.

Odan ózge mandattyq komıssııanyń otyrysy ótti. Konkýrsqa qatysýshy elder tanystyrylyp, qaýipsizdik erejeleri boıynsha nusqaýlyq ótkizildi.

– Áskerı topograftardyń jarysy elimizdiń aýmaǵynda alǵash ret ótedi. Alasa taýlardyń, usaq shoqylar men jazyq jerlerdiń bolýy mundaı saıysty uıymdastyrýǵa tamasha múmkindik. Biz jarysqa daıynbyz. Jerebe tastaldy. Endi Armııa halyqaralyq oıyndary resmı túrde ashylǵannan keıin topogeodezııalyq eseptoptardyń jarystary da bastalady, – dedi Qazaqstan Qarýly kúshteri Bas shtabynyń Geoaqparattyq qamtamasyz etý departamentiniń bastyǵy polkovnık Serik Joldybaev.

Bul saıys úsh kezeńnen turady: «Atys shebi», «Azımýt» jáne «Topografııalyq kvadratlon». Atys jarysynyń jeńimpazy jınaǵan upaı sanyna qaraı anyqtalady. Ekinshi kezeńde topograftardy daıyndaý deńgeıi arnaıy tapsyrmalardy oryndaý jyldamdyǵy men berilgen baǵyt boıynsha barlyq baqylaý núktelerinen ótkenin tirkeý arqyly baǵalanady.

Jarysty topografııalyq kvadratlon kezeńi aıaqtaıdy. Áskerı qyzmetshilerge birqatar arnaıy tapsyrmalardy oryndaý qajet. Olardyń ishinde aspaly polıgonometrııalyq júris, túrli kedergilerdi eńserý jáne arnaıy quraldardyń kómegimen obektilerdiń geografııalyq koordınattaryn anyqtaý bar ekenin atap ótken jón.

Foto: gov.kz