Aqmola oblysynda memlekettik-jekeshelik áriptestik sheńberinde 81 joba júzege asyrylýda

KÓKShETAÝ. QazAqparat - Qazirgi tańda Aqmola oblysynda ekonomıkanyń alty salasy boıynsha memlekettik jekeshelik áriptestik sheńberinde 81 joba iske qosyldy. Onyń ishinde basym kópshiligi bilim berý jáne densaýlyq saqtaý salasy boıynsha. Osy rette, jeke ınvestıtsııalardyń negizgi úlesi bilim berý salasyna tıesili – 64 joba, dep habarlaıdy QazAqparat tilshisi oblystyq ishki saıasat basqarmasyna silteme jasap.

Ekonomıka jáne bıýdjettik josparlaý basqarmasynyń málimetinshe, búginde senimgerlik basqarýǵa 45 nysan – segiz balabaqsha men 37 mektep ashanasy berildi. Jeke qarjylyq bastama aıasynda bes balabaqsha ashyldy. 12 mektep ashanasyn senimgerlik basqarýǵa berý jáne eki mektep salý boıynsha 14 joba josparlaý satysynda tur.

Densaýlyq saqtaý sııaqty mańyzdy salada jeti joba júzege asyrylýda. Býrabaı aýdanynyń aýdandyq aýrýhanasy men emhanasy jáne Stepnogorsk men Kókshetaý qalalarynyń emhanalary senimgerlik basqarýǵa berildi.

Kólik salasynda quny 4,5 mıllıard teńge bolatyn tórt joba boıynsha 1,3 mıllıard teńge somaǵa memlekettik mindettemelerdi qabyldaýmen sharttar jasaldy. Investıtsııalar arqasynda «Kókshetaý avtobýs parki» JShS 74 jańa jaıly avtobýs jáne «Seınýr» fırmasy» JShS 20 avtobýs satyp aldy.

Turǵyn úı qurylysy salasynda oblys ortalyǵyna jaqyn ornalasqan Krasnoıar aýylyndaǵy 32 páterli turǵyn úılerdi qalpyna keltirý boıynsha úsh joba júzege asyryldy. Qurylystar qalpyna keltirildi, páterlerdiń bir bóligi ákimdikke berildi, bir bóligi ınvestorlar satty.

Tabıǵatty qorǵaý salasynda Atbasar aýdanynyń Sepe aýylyndaǵy bógetti odan ári paıdalanýmen kúrdeli jóndeý jumystaryn júrgizýge shart jasaldy. Endi bógetti paıdalaný, ony tıisti jaǵdaıda ustap otyrý kásipkerge júkteledi. Jazda turǵyndar baqshalardy sýarý, malǵa kútim jasaý úshin sýdy tegin alady, balyq aýlaıdy, endi úılerin sý basý qaýpi joq.

«Jobalar óte mańyzdy, olar túrli salalarda jasalǵan. Basqa salalarda jasalatyn jobalarǵa qatysty mindetti túrde «memlekettik mindettemelerdi qabyldaýmen» degen sóz tirkesi bolady. Solaı bolýy kerek. Memleket pen bıznestiń jaýapkershiligi yntymaqty, shart talaptarynyń saqtalýy qatań baqylanýy tıis», – dedi Ekonomıka jáne bıýdjettik josparlaý basqarmasyndaǵylar.