Aqmola oblysynda memlekettik qyzmet mektebi ashyldy

KÓKShETAÝ. QazAqparat  -  Aqmola oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamenti men oblystyq jastar saıasaty máseleleri basqarmasy birlesip  memlekettik qyzmet mektebin ashty, dep habarlaıdy QazAqparat tilshisi vedomstvonyń baspasóz qyzmetine silteme jasap.

Memlekettik qyzmet mektebin ashýdaǵy basty maqsat - talantty, saýatty, bilimdi,  jaýapty, uıymdastyrýshylyq jáne kóshbasshylyq qabileti bar jastardy memlekettik qyzmetke tartý.

Mekteptiń ashylýy rásimine Aqmola oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Bergen Bespalınov jáne memlekettik basqarý akademııasynyń oblystyq fılıaly dırektorynyń mindetin atqarýshy Álibek Baımaǵambetov qatysyp, quttyqtaý sóz sóıledi.

  Joba Aqmola oblysyndaǵy joǵary bilim ordalarynda oqyp jatqan, keleshekte taǵdyryn memlekettik qyzmetpen baılanystyrǵysy keletin (18-29 jastaǵy) jastarǵa arnalǵan. Osy maqsatta Aqmola oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamenti men oblystyq jastar saıasaty máseleleri basqarmasy birlesip stýdentter arasynda irikteý  júrgizdi. Іrikteý nátıjesi boıynsha Kókshetaý qalasyndaǵy joǵary oqý oryndarynan tańdap alynǵan 20 stýdent  taǵylymdamadan ótetin boldy.

«Aqmola oblysynyń memlekettik qyzmet mektebi keleshegi zor jastar men memleketik organdardy baılanystyratyn kópir bolatynyna senim mol. Mekteptiń basty mindeti Elbasynyń «100 naqty qadam» Ult josparyn júzege asyrý baǵytynda kásibı memlekettik apparatty qalyptastyrýda joǵary bilikti, quzyretti, keleshegi bar jastardy daıarlaý» - dep atap ótti Bergen Bespalınov.