Aqmola oblysynda memleketaralyq izdeýde júrgen úsh qylmysker ustaldy

KÓKShETAÝ. QazAqparat - Aqmola oblysy aýmaǵynda memleketaralyq izdeýde júrgen úsh qylmysker ustaldy, dep habarlaıdy QazAqparat tilshisi oblystyq polıtsııa departamentiniń baspasóz qyzmetine silteme jasap.

Departament málimetinshe, qylmyskerlerdiń birine Reseıdiń Chelıabi oblysynyń tártip saqshylary RF Qylmystyq kodeksi 322-babynyń 2-bóligi «Reseı Federatsııasynyń Memlekettik shekarasyn zańsyz kesip ótý» boıynsha qylmystyq quqyq buzýshylyq jasaǵany úshin izdeý jarııalaǵan. Ony polıtsııa qyzmetkerleri Kókshetaý qalasynyń aýmaǵynan ustady.

Al ekinshi qylmysker - Aqmola oblysynyń týmasyn tártip saqshylary jedel-izdestirý is-sharasy barysynda Jarqaıyń aýdanynyń aýmaǵynan tapty.

«Ustalǵan adam buryn densaýlyqqa qasaqana aýyr zııan keltirgeni úshin sottalǵan (QR QK 106-baby 1-bóligi). Sot qaýlysyna sáıkes ol qalǵan merzimge shartty túrde merziminen buryn bosatyldy, alaıda turǵylyqty jeri boıynsha belgilenýge kelmeı Astana qalasyna ketip qalǵandyqtan, izdeý jarııalandy. Qazirgi ýaqytta ol ýaqytsha ustaý ızolıatoryna qamaldy», - dedi vedomstvodan.

Sonymen qatar, Stepnogor qalasy aýmaǵynda QR Qylmystyq kodeksi 190-babynyń 3-bóligi «alaıaqtyq» boıynsha memleketaralyq izdeýde júrgen qylmysker qolǵa tústi.

Aıta ketsek, budan buryn Aqmola oblysynda shetelden kelip, din ýaǵyzdap júrgen 29 mıssıoner baryn jazǵan edik.