Aqmola oblysynda memleketaralyq izdeýde júrgen qylmyskerler ustaldy
Polıtsııa departamenti baspasóz qyzmetiniń málimetinshe, oblys aýmaǵynda qoǵamdyq tártipti qamtamasyz etý, kóshelerde jáne basqa da qoǵamdyq oryndarda qylmystyń aldyn alý maqsatynda 12-15 jeltoqsan aralyǵynda «Quqyqtyq tártip» sharasy ótkizildi. Shara barysynda memleketaralyq izdeýde júrgen úsh qylmyskerdiń ornalasqan jeri anyqtaldy.
«Şýche qalasynyń aýmaǵynda Shyǵys Qazaqstan oblysynyń turǵyny ustaldy. Oǵan Semeı qalalyq polıtsııa bólimi Qylmystyq kodekstiń 188-baby 3-tarmaǵy boıynsha izdeý jarııalaǵan. Ustalǵan adamǵa eshqaıda ketpeý týraly qolhat túrinde shara qoldanyldy. Sonymen birge, QR QK 107-babynyń 1-bóligi boıynsha Qostanaı oblysy PD Beıimbet Maılın aýdandyq PB izdeýde júrgen taǵy bir qylmysker, Reseıdiń Qorǵan qalasy týmasynyń ornalasqan jeri anyqtaldy. Ol Kókshetaý qalasyndaǵy ýaqytsha ustaý oqshaýlaǵyshyna qamaldy. Buǵan qosa, tártip saqshylary QR QK 190-babynyń 4-bóligi boıynsha memleketaralyq izdeýde júrgen Astana qalasynyń týmasyn da tapty», - dedi vedomstvodan.
Polıtsııa departamenti baspasóz qyzmetinen atap ótkendeı, «Quqyqtyq tártip» jedel aldyn alý sharasy barysynda jazasyn túrmede ótep shyqqan, «Pedofıl» sanaty boıynsha polıtsııa bóliminde esepte turǵan oblys turǵynynyń ornalasqan jeri anyqtaldy.
Aıta ketsek, Kókshetaýda iz-túzsiz joǵalǵan 38 jastaǵy áıel izdestirilip jatyr.