Aqmola oblysynda memleket múlkin jymqyrǵan burynǵy bólim bastyǵy 5 jylǵa sottaldy

ARShALY. QazAqparat – Aqmola oblysynda memleket múlkin jymqyrǵan burynǵy bólim bastyǵy 5 jlǵa sottaldy, dep habarlaıdy QazAqparat Aqmola oblysy, Arshaly aýdandyq sotynyń málimetterine silteme jasap.

Sot taratqan aqparattarǵa qaraǵanda, Arshaly aýdanynyń turǵyn úı kommýnaldyq sharýashylyǵy bóliminiń burynǵy basshysy «A.» memlekettik menshiktegi gaz taratý stantsııasynyń ǵımaratyn buzyp, bólshekteýdi «J.» men «N.»-ǵa usynǵan jáne ruqsat qaǵazy úshin olardan 12 mıllıon teńge surady.

Aldyn ala tólem retinde «A.» olardan 4 mıllıon teńge alyp, buzý quqyǵyn berý týraly jalǵan anyqtama berdi. Keıin, «A.» olarǵa obektini buzýdyń ornyna jalǵa alýdy usynyp, olarmen 30 jylǵa múliktik basqarý shartyna qol qoıysty, bul úshin taǵy aqsha talap etken.

Osylaısha, «A.» qyzmettik babyn paıdalana otyryp, iri kólemde alaıaqtyq jasady (QK-niń 190-baby, 3-bóliginiń 1),2)-tarmaqtary).

Sonymen qatar, «A.» óz tanysynan 11 000 000 teńge qaryz alyp, oǵan TKSh bóliminiń balansynda turǵan generatorlyq qondyrǵyny kepilge bergen. Sóıtip, «A.» memleketke 1 322 381 teńge somasynda materıaldyq zalal keltirip, ózine senip tapsyrylǵan múlikti jymqyrǵan (QK-niń 189-baby 3-bóliginiń 2)-tarmaǵy).

«A.»-nyń kinási jábirlenýshiler men kýágerlerdiń aıǵaqtary, aıǵaqtardy tekserý jáne naqtylaý hattamalary, qujattardy alý jáne qaraý hattamasy, qabyldaý-tapsyrý aktisi, tekserý hattamasy, sarapshylardyń qorytyndylary, aýdıtorlyq esep arqyly dáleldendi.

Jaza taǵaıyndaýda sot jeńildetetin mán-jaılardy - onyń jas balalary bar ekenin jáne aýyrlatatyn mán-jaılardy - memlekettik qyzmetshiniń antyn buzǵan adamnyń qylmystyq quqyq buzýshylyq jasaýyn eskerdi.

Sot úkimimen «A.»-ǵa memlekettik qyzmette qyzmet atqarý quqyǵynan ómir boıyna aıyra otyryp, 5 jyl bas bostandyǵynan aıyrý jazasy taǵaıyndaldy.

Úkim zańdy kúshine engen joq.