Aqmola oblysynda mektep oqýshylaryna materıaldyq kómek kórsetiledi

KÓKShETAÝ. QazAqparat - Aqmola oblysynda 6-18 jastaǵy balalarǵa tótenshe jaǵdaı kezinde azyq-túlik pen turmystyq jınaq satyp alýy úshin materıaldyq kómek kórsetiledi, dep habarlaıdy QazAqparat tilshisi oblystyq ishki saıasat basqarmasyna silteme jasap.

Bul tizimge áleýmetik jaǵynan az qamtylǵan jáne kópbalaly otbasylar, ataýly áleýmettik kómek alatyn otbasylardaǵy 2800 astam oqýshy enip otyr. Aqmola oblystyq jumyspen qamtýdy jáne áleýmettik baǵdarlamardy úılestirý basqarmasy basshysynyń orynbasary Sholpan Rahmatýllınanyń málimetinshe, ata-analardyń esep-shotyna aýdarý úshin qarajat aýdandyq bólimderge jiberildi.

«Karantın sharalary engizilgendikten turǵyndar ózine qajetti azyq-túlik, turmystyq jınaqty satyp alýy jáne ózge de shyǵyndardy óteýi úshin aqshany aýdarý týraly sheshim qabyldandy», - dep atap ótti Sholpan Rahmatýllına.

Aıta keteıik, 2020 jyldyń 1 qańtarynan bastap Qazaqstanda ataýly áleýmettik kómek kórsetýdiń mehanızmi jetildirildi.

Memlekettik kómektiń jańa ádisi keshendi túrde júzege asyrylady jáne onyń ishine: kópbalaly otbasylarǵa jańa memlekettik járdemaqy, ataýly áleýmettik kómek, az qamtylǵan otbasylardaǵy balalarǵa kepildendirilgen áleýmettik paket, onyń ishinde 1-6 jastaǵy balalarǵa azyq-túlik, turmystyq hımııa taýarlary kiredi.