Aqmola oblysynda mamyr merekelerinde 5 myńnan astam is-shara ótedi
Basqarma basshysynyń aıtýynsha, bıyl Birlik kúnin merekeleý qazaqstandyqtardyń Ádiletti Qazaqstannyń qundylyqtarynyń aınalasynda birlesýi jáne toptasýy uranymen ótedi.
Merekelik is-sharalardyń ıdeıalyq mazmuny ózara senim men azamattyq teńdik qaǵıdattary, barsha qazaqstandyqtardyń bir-birine izgi nıeti, ár azamattyń el taǵdyryna jaýapkershiligin sezinýi negizinde qazaqstandyq birlikti damytý, órkendegen memleketti júıeli túrlendirý jáne birlesip qurý tujyrymdamalaryna negizdelgen.
«Merekelik sharalar ádiletti memlekettilikti birlesip nyǵaıtýǵa baǵyttalǵan qoǵamnyń azamattyq-patrıottyq toptasýyn pash etýge, qoǵamnyń qazaqstandyqtardy birtutas ultqa biriktirý jónindegi syndarly bastamalaryn yntalandyrýǵa, «Áralýandyqtaǵy birlik» ámbebap qaǵıdaty negizinde Qazaqstan halqynyń mádenı sanalýandyǵyn qoldaý jáne kótermeleýge, sondaı-aq, qaıyrymdylyq, yntymaqtastyq jáne tatý kórshilikti dáripteýge baǵyttalyp otyr. Onyń josparyn daıyndaýǵa jáne ótkizýge úkimettik emes uıymdardyń, etnomádenı, jastar birlestikteriniń ókilderi atsalysty», - dedi Almas Alın.
Osy rette óńirde birlik kúnine arnalǵan is-sharalar 24 sáýirden bastaý alady.
Oblystyń barlyq mektepteri men kolledjderinde «Dostyq kúnin» jáne «Birlik sabaqtaryn» ótkizý josparlanǵan.
Sonymen qatar, áleýmettik jeli arqyly «Bir shańyraq astynda» taqyrybynda túrli aktsııalar, rolıkter men chellendjder ótkizý qarastyrylǵan.
28 sáýirde «Bolashaq saraıy» Qazaqstan halqy Aqmola Assambleıasynyń etnomádenı birlestikteri men qoǵamdyq qurylymdary ókilderiniń qatysýymen saltanatty kezdesý ótedi.
29 sáýirde «Táýelsizdik» alańynda aýyl sharýashylyǵy ónimderiniń jármeńkesi ótedi.
Sondaı-aq, oblystyń barlyq óńirlerinde merekelik is-sharalardy uıymdastyrý, saıabaqtarda Áleýmettik jáne qaıyrymdylyq jármeńkelerin uıymdastyrý kózdelgen.
Negizgi is-shara 1 mamyr kúni Kókshetaý qalasynyń jaǵajaı aýmaǵynda ótedi.
Bul kúni saǵat 13:00-16:00 aralyǵynda oblys óńirleriniń shyǵarmashylyq ujymdarynyń qatysýymen «Bir shańyraq astynda» jáne Qazaqstan halqy Aqmola Assambleıasy etnomádenı birlestikteriniń qatysýymen «Dostyq dámi» oblystyq festıvalderi ótedi.
Budan bólek, 17 shatyr tigilip, onda qala turǵyndary men qonaqtary úshin Qazaqstan halqynyń ulttyq salt-dástúrleri, ádet-ǵuryptary men taǵamdarynyń, taǵy 3 shatyrda taqyryptyq mazmundaǵy sándik-qoldanbaly óner týyndylarynyń kórmeleri usynylady.
Al merekelik shara keshki saǵat 18:00 oblystyq jastar resýrstyq ortalyǵy uıymdastyrǵan jastarǵa arnalǵan oıyn-saýyq baǵdarlamasyna jalǵasady.
Basqarma basshasy atap ótkendeı, Otan qorǵaýshylar kúni men Jeńis kúnin merekeleý áskerı dástúrlerdiń sabaqtastyǵymen, memlekettiń beıbitshiligi men táýelsizdigin saqtaýǵa jáne nasıhattaýǵa baǵyttalǵan.
«Dástúr boıynsha, bul kúnderi Qazaqstan Áskeriniń bedelin arttyrýǵa, qatardaǵy qazaqstandyqtardyń rýhy men patrıottyq sezimin nyǵaıtýǵa, Qazaqstan Respýblıkasynyń Qarýly Kúshteri qataryndaǵy qyzmettiń ımıdjin arttyrýǵa yqpal etetin qoǵamdyq mańyzy bar is-sharalar, áskerı baıqaýlar, merekelik kontsertter, patrıottyq aktsııalardy ótkizý josparlanǵan. Otan qorǵaýshylar men Jeńis kúnin merekeleýdiń biryńǵaı merkelik atrıbýty qoǵamda keń qoldaýǵa ıe bolǵan memlekettik Tý túsindegi patrıottyq «Jeńis lentasy» bolyp tabylady. Bıyl bizdiń qaharman batyrlarymyzdy eske alýǵa arnalǵan «Er esimi – el esinde» atty onlaın aktsııasy osy maqsatta arnaıy qurylǵan platformada ótkiziletin bolady. Bul qazaqstandyq batyrlar týraly barlyq aqparatty jınaqtaýǵa múmkindik beredi», - dep tolyqtyrdy Almas Alın.
Sonymen qatar, 9 mamyr kúni maıdanger batyrlardyń eskertkishterine gúl shoqtaryn qoıý rásimderi barlyq jerde ótedi. Kókshetaýda Máńgilik alaý jáne Málik Ǵabdýllın men Talǵat Bıgeldınovtyń eskertkishterine gúl shoqtaryn qoıý rásimi ótkiziledi.
«Óńirimizdiń eldi mekenderin merekelik bezendirý maqsatynda 150-den astam taqyryptyq bannerler ornatý josparlanǵan. Oblysta Qazaqstan halqynyń birligi kúnin, Otan qorǵaýshylar men Jeńis kúnderin merekeleýge arnalǵan negizgi oqıǵalar men mańyzdy is-sharalardy aqparattyq jarııalaý boıynsha medıa-jospar bekitildi. Jalpy, oblys boıynsha Qazaqstan halqynyń birligi kúni, Otan qorǵaýshylar kúni jáne Jeńistiń 78 jyldyǵyn merekeleý aıasynda 5000-nan astam is-shara ótkizý josparlanǵan», - dep túıindedi Almas Alın.
Aıta ketsek, budan buryn Aqmola oblysynda Naýryz meıramy aıasynda 1 myńnan astam is-shara ótetinin jazǵan edik.