Aqmola oblysynda mal sany ósti

KÓKShETAÝ. QazAqparat – Aqmola oblysynda eginshilik salasymen qatar, mal sharýashylyǵy salasyna zor kóńil bólinýde. Memlekettik qoldaýdyń arqasynda óńirde jyldan jylǵa mal sany arttýda, dep habarlaıdy QazAqparat tilshisi oblystyq ishki saıasat basqarmasyna silteme jasap.

Oblystyq aýyl sharýashylyǵy basqarmasynyń málimetinshe, atalmysh sala óńirde etti jáne sútti baǵytta damytylyp jatyr. Bıyl óńirde 27 ferma ashylyp, 2 myńnan astam asyl tuqymdy iri qara satyp alyndy. Onyń 19 ferma qazirgi kezde jumys istep tur. Oblysta 1,6 myńnan astam sıyrǵa arnalǵan 9 taýarly sút fermasy jumys isteıdi.

Jyl sońyna deıin taǵy 18 ferma ashyp, mal basyn 2,5 myńǵa arttyrý josparlanǵan.

Sondaı fermalardyń biri, Zerendi aýdanynda ornalasqan 200 basqa arnalǵan «Mıl prodjekt» JShS. Kásiporyn belgilengen merziminen buryn iske qosyldy. Munda Gollandııadan asyl tuqymdy 99 bas golshtın sıyrlary ákelindi. Qazirgi kezde bul sıyrlar bizdiń klımatqa beıimdeldi.

Seriktestiktiń mal dárigeri Dmıtrıı Stepınniń aıtýynsha, ferma ızraıldyń qazirgi zamańǵy tehnologııasy boıynsha jabdyqtalǵan.

«Fermada barlyǵy avtomattandyrylǵan jáne biryńǵaı pýlt ortalyǵy arqyly basqarylady. Júıe arqyly sıyrdyń densaýlyǵyn, tamaqtanýyn baqylaýǵa bolady», - deıdi Dmıtrıı Stepın.

Sonymen birge, sıyr saýýda ıntellektýaldyq júıe arqyly «aqyldy saýý» ınnovatsııalyq tehnologııasy qoldanylady. Aldaǵy ýaqytta kompanııa mal basyn 350-400-ge, jyldyq sút óndirisin 6 myń tonnaǵa josparlap otyr.

Jalpy, oblys boıynsha 2023 jyldary 700 jańa ferma ashyp, saýyn sıyr sanyn 35 myń basqa jetkizý josparlanǵan.