Aqmola oblysynda qus fabrıkalarynyń hali múshkil

KÓKShETAÝ. QazAqparat - Sebebi jemniń qymbattaýynan jumyrtqanyń ózindik quny sharyqtap ketti, dep habarlaıdy QazAqparat Habar 24 arnasyna silteme jasap.

«Qalyptasqan baǵada satýǵa aldymen antımonopolııa ruqsat bermeıdi, odan qaldy básekege tótep berý qıyn. Sondyqtan shyǵynǵa batyp jatyrmyz. Bulaı jalǵasa berse, qustardan qutylyp, óndiris kólemin azaıtýǵa týra keledi», – deıdi kásip ıeleri.

Bul – jylyna 320 mln dana jumyrtqa shyǵaratyn elimizdegi eń iri qus fabrıkalarynyń biri.

Alaıda, alyp óndiris oshaǵynyń qazir sharýasy shatqaıaqtap tur. Sebebi taýyqtarǵa jem taýyp berý qıyn.

Al bıdaıdy buryn kórshi elden arzan baǵada satyp alsa, bıyl onyń da joly jabyldy. Saldarynan qazaqstandyq astyq qymbattap shyǵa keldi.

– Máselen, qazir Reseıde bıdaıdyń kelisi 90-95 teńge bolsa, al bizde 150 teńgeniń mańaıynda. Biraq sonyń ózin tabý qıyn. Osylaısha jumyrtqanyń ózindik quny ósti. Biraq ol baǵada sata almaımyz. Sóıtip ár jumyrtqadan qazir 7-8 teńgege shyǵynǵa batyp jatyrmyz. Bulaı jalǵasa berse, bankrot bolýymyz múmkin, - deıdi qus fabrıkasynyń dırektory Borıs Ozdoev.

Al jazǵa qaraı jumyrtqaǵa suranys azaıady. Soǵan qaramastan aımaqqa Reseıden arzan ónim qaptap kiredi. Bul da «jyǵylǵanǵa judyryq» bolmaq.

Fabrıkany qurdymǵa ketirmeý úshin mundaǵylar endi qustyń sanyn aı saıyn 10 protsentke azaıtý jaıly sheshim qabyldap otyr.

Sebebi qandaı qıyn jaǵdaı bolmasyn, kásiporyndy saqtap qalý qajet.

– Qyzmetkerlerdi qysqartý ázirge josparymyzda joq. Bizde 250 adam eńbek etedi. Biraq olar da barlyq óndiristegi mamandar sekildi jalaqynyń kóterilgenin qalaıdy, júıeli túrde syıaqy alǵysy keledi. Biraq ol qazir ókinishke qaraı múmkin emes, - dep atap ótti Borıs Ozdoev.

Fabrıka basshylyǵy endi memleketten qoldaý kútedi. Aıta ketý kerek, elimizde bıyl qus fabrıkalaryna beriletin sýbsıdııa da toqtady.

Al jaýapty basqarma ókilderi, qazirgi qıyn jaǵdaıdy eskere otyryp, atalǵan qarjylaı qoldaý qaıta jalǵasatynyn aıtady. Odan bólek, jem alýǵa da járdem jasalmaq.

– Azyq-túlik korporatsııasy arqyly 117 myń teńge 1 tonna baǵamen jem beriledi. Qazirgi tańda naryqtaǵy baǵa 150 myń, 160 myń teńgege deıin baryp jatyr. Sol sebepten, ol, bylaı qarap tursa, 25 paıyzǵa arzandatylǵan jem bolady, - deıdi oblystyq aýyl sharýashylyǵy basqarmasynyń bólim jetekshisi Qaırat Kóshenov.

Aqmola oblysynda 4 birdeı qus fabrıkasy bar edi. Biraq onyń bireýi byltyrǵy jyldyń sońynda bankrotqa ushyrap, jabylyp tyndy.