Aqmola oblysynda «Qulager» baıqaýynyń jeńimpazdary anyqtaldy

KÓKShETAÝ. QazAqparat - Jańa jyl qarsańynda Aqmola oblysynda aqyndar, prozashylar jáne shyǵarmashylyqpen aınalysatyn azamattar arasynda ótken «Qulager» baıqaýynyń jeńimpazdary men laýreattary marapattaldy, dep habarlaıdy QazAqparat tilshisi oblystyq ishki saıasat basqarmasynyń baspasóz qyzmetine silteme jasap.

Sharada aımaq basshysy Ermek Marjyqpaevtyń atynan oblys ákiminiń orynbasary Aına Mysyrálimova quttyqtaý sóz sóılep, jeńimpazdarǵa aqshalaı sertıfıkat tapsyrdy.

«Oblys árqashan da talanttarǵa baı. Bıyl ólkemizdiń ádebıet jáne óner sheberleri qazaqstandyq rýhanııatqa ólsheýsiz úles qosty. Baıqaý jarııalanǵan sátten bastap búgingi kúnge 700-den astam ótinim kelip tústi. On atalymnyń árqaısysy boıynsha jeńimpaz anyqtaldy. Bolashaqta osyndaı shyǵarmashylyq jarystardy kóbirek ótkizýdi josparlap otyrmyz», - dedi Aına Mysyrálimova.

Baıqaý erekshe eńbekterin yntalandyrýǵa jáne tanýǵa, óńirdiń ádebıeti men mádenıetin damytýǵa úlken úles qosqan shyǵarmashylyq adamdar men ǵylymı zııaly qaýymǵa, sondaı-aq olardyń jemisti ǵylymı, shyǵarmashylyq jáne qoǵamdyq qyzmetine, oblystyń mádenı ómirine belsendi qatysqany úshin jáne shyǵarmashylyqtyń barlyq janrlary men baǵyttarynda joǵary kórkem týyndylar jasaǵany úshin qoldaý kórsetýge baǵyttalǵan.

«Táýelsizdik jyldaryndaǵy Qazaqstannyń jetistikterine arnalǵan úzdik shyǵarma» atalymy boıynsha «Aqmola-Tirshilik» JShS dırektory Jabal Erǵalıev jeńimpaz atandy.

Ulttyq mádenıetti, salt-dástúr, ádet-ǵurypty qaıta jańǵyrtýǵa, saqtaýǵa jáne damytýǵa, qazaqstandyq ulttyq biregeılikti saqtaýǵa qosqan úlesi úshin Baqyt Smaǵul eńbegi atap ótilse, Mergen Toqsanbaı úzdik jas aqyn atandy.

Aıta keteıik, epıdemıologııalyq jaǵdaıǵa baılanysty is-shara áleýmettik qashyqtyq pen sanıtarlyq-epıdemıologııalyq sharalardy saqtaı otyryp, yqsham formatta ótti.