Aqmola oblysynda kommýnaldyq qyzmetterdiń tarıfteri 1 shildege deıin kóterilmeıdi

KÓKShETAÝ. QazAqparat - Aqmola oblysynda kommýnaldyq tarıfterdiń negizsiz ósýine jol bermeý sharalar qarqyndy júzege asyrylýda. Bul týraly óńirlik kommýnıkatsııalar qyzmetinde ótken brıfıngte oblystyq tabıǵı monopolııalardy retteý departamentiniń basshysy Azamat Sabyrjan málimdedi, dep habarlaıdy QazAqparat tilshisi oblystyq ishki saıasat basqarmasyna silteme jasap.

Departament basshysynyń málimetinshe, bıyldan bastap baǵalar men tarıfterdiń negizsiz ósýin boldyrmaýmen qatar tabıǵı monopolııalar sýbektileri qyzmetiniń ashyqtyǵyn arttyrýǵa jáne tarıftik smetalardyń oryndalýyn baqylaýdy kúsheıtýge baǵyttalǵan jańa zań qabyldandy.

«Tabıǵı monopolııa sýbektisi, áleýmettik mańyzy bar qoǵamdyq sýbektiler men baǵalar halyq úshin jeltoqsan baǵalary deńgeıinde. Qazirgi ýaqytta kommýnaldyq qyzmetterdiń baǵasy turaqty. Tarıfterge taldaý júrgizildi. Osy taldaý nátıjeleri boıynsha 24 sýbektiniń 36 qyzmeti boıynsha zań buzýshylyqtar anyqtalyp, 1 mıllıard 24 mıllıon teńge somasyna ótemdik tarıf engizildi», - dedi Azamat Sabyrjan.

Qazirgi ýaqytta departament 145 rettelip kórsetiletin qyzmetti usynatyn 74 tabıǵı monopolııa sýbektisin retteıdi, olardyń ishinde jylýmen jabdyqtaý, elektr energııasyn berý, sýmen jabdyqtaý jáne sý burý, suıytylǵan gazdy tasymaldaý jáne basqa qyzmetter bar.

«2021 jyly departament 75 ákimshilik is qozǵady, onyń 3-ýi ákimshilik is tekserý qorytyndysy boıynsha qozǵaldy. Qaraý nátıjeleri boıynsha tabıǵı monopolııalar sýbektilerine 75 ákimshilik is boıynsha 65 723 888 teńge (100 paıyz) aıyppul salyndy, - dep tolyqtyrdy Azamat Sabyrjan.

Aıta ketsek, moratorıı engizilýine baılanysty kommýnaldyq qyzmetterdiń qoldanystaǵy tarıfteri turǵyndar úshin aǵymdaǵy jyldyń 1 shildesine deıin ózgerissiz qalady.