Aqmola oblysynda qoǵamdyq orynda mas kúıde júrgen ákim jazalandy

KÓKShETAÝ. QazAqparat - Aqmola oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamentiniń Ádep jónindegi keńestiń kezekti otyrysy ótti. Onda birqatar memleketttik qyzmetshilerdiń tártiptik isteri qaraldy, dep habarlaıdy QazAqparat tilshisi vedomstvonyń baspasóz qyzmetine silteme jasap.

Tártiptik keńeste Egindikól aýylynyń ákimi A.Bashenov, Atbasar aýdandyq turǵyn úı kommýnaldyq sharýashylyǵy, jolaýshylar tasymaly, avtomobıl joldary jáne turǵyn úı ınspektsııasynyń bólim basshysy J.Baldaqov, Kókshetaý qalasy ákiminiń orynbasary I.ıÝrchenko, Kókshetaý qalalyq sáýlet jáne qala qurylysy bóliminiń basshysy men onyń orynbasary I.Ábenov pen D.Muhambetqalıeva qatysty tártiptik ister talqylandy.

Onyń ishinde qoǵamdyq jerde mas kúıde júrgen Egindikól aýylynyń ákimi A.Bashenov Ádep kodeksiniń normalaryn buzǵany úshin «qatań sógis» túrinde tártiptik jaýapkershilikke tartyldy.

Al Kókshetaý qalasy ákiminiń orynbasary I.ıÝrchenko, Kókshetaý qalalyq sáýlet jáne qala qurylysy bóliminiń basshysy Ilýa Ábenov pen onyń orynbasary D.Muhambetqalıevanyń tártiptik jaýapkershilikke tartylýyna qalalyq prokýratýra tarapynan qozǵalǵan qylmystyq is arqaý bolǵan. Prokýratýra anyqtaǵandaı 2015-2017 jyldar aralyǵynda jer telimin usynýda kóptegen zań buzýshylyqtar oryn alǵan. Sol sebepti Ádep keńesiniń músheleri bir aýyzdan úsheýine de "qyzmetine laıyq emes" degen uıǵarymǵa keldi.

Sonymen qatar, osyndaı jaza Atbasar aýdandyq turǵyn úı kommýnaldyq sharýashylyǵy, jolaýshylar tasymaly, avtomobıl joldary jáne turǵyn úı ınspektsııasynyń bólim basshysy J.Baldaqovqa da taǵaıyndaldy.