Aqmola oblysynda kásipkerge 5 mln teńgedeı zańsyz aıyppul salmaq bolǵan sheneýnikter jazalandy

KÓKShETAÝ. QazAqparat - Tselınograd aýdanynyń prokýratýrasy ótinishti tekserý barysynda kásipkerliktiń qyzmetine negizsiz aralasý deregin anyqtady, dep habarlaıdy QazAqparat tilshisi.

Aqmola oblystyq prokýratýrasy baspasóz qyzmetiniń málimetinshe, Tselınograd aýdandyq sanıtarlyq-epıdemıologııalyq baqylaý basqarmasynyń qyzmetkeri tarapynan «Mánshúk AE» JShS-na erekshe tártip boıynsha tekserý júrgizilgen. Tekserý sheńberinde kásipker obektisinde tamaq ónimderi men shaıyndylardyń synamalary alyndy jáne júrgizilgen zertteýlerdiń nátıjeleri boıynsha shekti ruqsat etilgen sanıtarııalyq kórsetkishterdiń asyp ketýi anyqtalǵan. Osy mán-jaılardy eskere otyryp, basqarma JShS-nyń atyna buzýshylyqtardy joıý týraly nusqama engizip, ÁQBtK-niń 425-baby boıynsha ákimshilik hattama toltyrǵan, onyń sanktsııasymen 5 mln teńgeden astam aıyppul kózdelgen.

Alaıda, prokýrorlyq tekserý kórsetkendeı, basqarma qyzmetkeriniń áreketteri zańsyz bolǵan. Óıtkeni tekserilgen obektilerde qyzmetti 2020 jylǵy 11 mamyrdaǵy «Mánshúk AE» JShS-men jasalǵan jaldaý sharty negizinde basqa kásipkermen júzege asyrylǵan.

«Tekserý kezinde buzýshylyqtar anyqtalǵan obektilerge «Mánshúk AE» JShS-niń eshqandaı qatysy bolmaǵan, bul anyqtalǵan buzýshylyqtar úshin onyń jaýapkershiligin joqqa shyǵarady. Tselınograd aýdany prokýratýrasynyń aktisi boıynsha Aqmola oblysynyń sanıtarlyq-epıdemıologııalyq baqylaý departamenti aýdandyq basqarma qyzmetkeriniń «Mánshúk AE» JShS-ne qatysty júrgizgen tekserýin zańsyz dep tanydy, ákimshilik quqyq buzýshylyq boıynsha is júrgizý toqtatyldy. Baqylaýdyń joqtyǵy úshin Tselınograd aýdany sanıtarlyq-epıdemıologııalyq baqylaý basqarmasynyń basshysy tártiptik jaýapqa tartyldy, al bıznes sýbektisiniń qyzmetine negizsiz aralasqany úshin basqarma qyzmetkeri ÁQBtK-niń 175-babynyń 1-bóliginiń 5-tarmaqshasymen ákimshilik jaýapqa tartyldy», - dedi vedomstvodan.

Aıta ketý kerek, Kókshetaý polıtseıleri 50 myń dollar aldy degen kúdikke ilindi.