Aqmola oblysynda karantın talaptaryn buzǵandarǵa 39 mıllıon teńge aıyppul salyndy

KÓKShETAÝ. QazAqparat - Aqmola oblysynda karantındik talaptardy buzǵandarǵa 39 mıllıon teńge aıyppul salyndy. Bul týraly óńirlik kommýnıkatsııalar qyzmetinde ótken brıfıngide oblystyq sanıtarlyq epıdemıologııalyq baqylaý departamentiniń basshysy Aınagúl Mýsına aıtty.

Onyń aıtýynsha, óńir «qyzyl» aımaqta ornalasqanyna qaramastan, jeke kásipkerlik sýbektileri karantındik shekteýlerdi buzýdy jalǵastyrýda. Jyl basynan beri 14968 nysan tekserilip, onyń 279-na karantındik sharalardyń buzylǵandyǵy anyqtaldy. Nátıjesinde olarǵa jalpy somasy 39 mıllıon teńge bolatyn 343 ákimshilik aıyppul salyndy. Aǵymdaǵy aıda monıtorıngpen 3289 obekt qamtyldy, karantındik sharalardy buzýdyń 54 oqıǵasy anyqtaldy. Anyqtalǵan buzýshylyqtar úshin 5 mıllıon teńgege 41 ákimshilik aıyppul salyndy. Bir apta ishinde (aǵymdaǵy jylǵy sáýirdiń 19-25 aralyǵynda) 1017 obekt monıtorıngpen qamtyldy, karantındik sharalardy buzýdyń 19 oqıǵasy anyqtaldy (Atbasar - 2, Bulandy - 2, Býrabaı - 1, Sandyqtaý - 1, Kókshetaý - 12, Stepnogorsk - 1.

«Anyqtalǵan buzýshylyqtar úshin jalpy somasy 1 mıllıon teńgege 17 ákimshilik aıyppul salyndy. Kóbine karantındik talaptardyń demalys kúnderi buzylady. Mysaly, eger ótken aptada 19 karantındik talaptardyń buzylǵandyǵy anyqtalsa, olardyń 7-i dál demalys kúnderi tirkelgen (36,8 paıyz). Sońǵy demalys kúnderi, ıaǵnı 24-25 sáýirde oblystyń jeti nysanda osyndaı jaǵdaı tirkeldi», - dedi Aınagúl Mýsına.

Karantındik talaptardyń buzylýyna jol bergen nysan eki ret 670 myń teńge somasynda aıyppul retinde ákimshilik jaýapkershilikke tartyldy, taǵy eki ákimshilik is materıaly qaralyp jatyr.