Aqmola oblysynda Indýstrııalandyrý kartasy boıynsha barlyǵy 75 joba paıdalanýǵa berildi
Aqmola oblysynyń ónerkásip jáne kásipkerlik basqarmasynyń ındýstrıaldy-ınnovatsııalyq damý bóliminiń basshysy Almas Saǵdıevtiń aıtýynsha, sońǵy jeti jylda iske qosylǵan jobalar óńirde 7,7 myńǵa jýyq jumys ornyn ashýǵa múmkindik berdi.
«Óńirde 2010-2019 jyldarǵa arnalǵan Indýstrııalandyrý kartasyna quny 782,5 mıllıard teńgeniń 90 jobasy engizilip otyr. Bul degenimiz 12,3 myń jańa jumys orny. Búgingi kúnge deıin bul jobalardyń ishinde quny 223,6 mıllıard teńgeni quraıtyn 75 joba paıdalanýǵa berilip, qosymsha 7,7 myńǵa jýyq jumys orny ashyldy. Olardyń arasynda altyn ken orny «Altyntaý Kókshetaý» JShS, jylyjaı kesheni «Qazaqstannyń jylyjaı tehnologııasy» JShS jáne kirpish zaýyty «Enkı» JShS tárizdi iri jobalar júzege asyryldy. Erteń Elbasy Nursultan Nazarbaevtyń qatysýymen Stepnogor qalasynyń Aqsý kentinde quny 30 584,8 mıllıon teńge turatyn Dore qorytpasyn óndiretin «Kazaqaltyn Technology» JShS iske qosý josparlanyp otyr. Bul tehnogendik mıneraldy túzilimderdi qaıta óńdeý boıynsha, keıinnen Dore qorytpasy túrinde altyn men kúmisti shyǵaratyn respýblıkadaǵy jalǵyz kásiporyn bolyp tabylady. Qaıta óńdeýdiń jalpy óndiristik qýaty jylyna 7 mıllıon tonna tehnogendik mıneraldy túzilimderdi quraıdy. Kásiporynnyń qurylysy kezinde 280 adam, al, iske qosylǵan kezde 745 adam jumyspen qamtylady dep josparlanyp otyr. Jalpy, oblysta Indýstrııalandyrý kartasyna qosylǵan jobalar jeterlik. Solardyń qatarynda respýblıkalyq deńgeıdegi «Qazatomónerkásiptiń birikken kúkirtqyshqyly zaýyty» jáne «Masaly taý ken kombınaty» jaýapkershiligi shekteýli seriktestikteri tárizdi jobalar bar», - deıdi Almas Saǵdıev.
Jalpy, Indýstrııalandyrý aýyl sharýashylyǵy, qurylys, taý-ken, hımııa, jeńil ónerkásip, taǵam, farmatsevtıka, mashına qurylysy, energetıka jáne munaı óndeý tárizdi on kezeń boıynsha júzege asyrylýda. 2010 jyldan beri oblys boıynsha júzege asyrylǵan jobalardyń arqasynda barlyǵy 759,3 mıllıard teńgeniń ónimi óndirilse, bıylǵy jyldyń basynan beri bul kórsetkish 220,5 mıllıard teńgeni qurady.
Aıta ketý kerek, jalpy, Aqmola oblysynda Indýstrııalandyrý kartasy sheńberinde quny 223,6 mıllıard teńgeni quraıtyn 75 joba paıdalanýǵa berildi. Olardy jyldarǵa bólsek bylaı shyǵady:
2010 jyly jalpy 73,2 mlrd teńge somasyna 10 joba iske qosylyp, 3017 turaqty jumys orny quryldy.
2011 jyly 18,4 mlrd teńge somasyna 14 joba iske qosylyp, 670 turaqty jumys orny quryldy.
2012 jyly 7,1 mlrd teńge somasyna 6 joba iske qosylyp, 380 turaqty jumys orny quryldy.
2013 jyly 3,5 mlrd teńge somasyna 9 joba iske qosylyp, 433 turaqty jumys orny quryldy.
2014 jyly 19,1 mlrd teńge somasyna 10 joba iske qosylyp, 746 turaqty jumys orny quryldy
2015 jyly 23,4 mlrd teńge somasyna 8 joba iske qosylyp, 742 jumys orny quryldy.
2016 jyly 13,9 mlrd teńge somasyna 15 joba iske qosylyp, 845 jumys orny quryldy.
2017 jyly 64,7 mlrd teńge somasyna 3 joba iske qosylyp, 840 jumys orny quryldy.