Aqmola oblysynda gepatıtpen syrqattanýshylyq 6 esege artqany baıqalady

KÓKShETAÝ. QazAqparat - Aqmola oblysynda gepatıtpen syrqattanýshylyq monıtorıngine sáıkes bıylǵy jarty jylda ótken jyldyń sáıkes kezeńimen salystyrǵanda jiti vırýstyq gepatıttermen syrqattanýshylyq 6 ese artyp otyr. Bul týraly 28 shilde - Dúnıejúzilik gepatıtpen kúres kúni Aqmola oblystyq sanıtarııalyq-epıdemıologııalyq baqylaý departamentiniń baspasóz qyzmetinen málim etti, dep habarlaıdy QazAqparat tilshisi.

«Óńirde gepatıtpen syrqattanýshylyq monıtorıngine sáıkes 2022 jyldyń birinshi jartyjyldyǵynda ótken jyldyń uqsas kezeńimen salystyrǵanda jiti vırýstyq gepatıttermen syrqattanýshylyq 6 ese, onyń ishinde A gepatıti vırýsymen 4 ese, sozylmaly V gepatıti vırýsymen (delta) 8 ese óskeni baıqalady. Anyqtalǵan aýrýlardyń eń kóp sany Kókshetaý qalasynda (26 jaǵdaı), Arshaly (11), Atbasar (5), Shortandy (4), Býrabaı (3), Ereımentaý (3), Sandyqtaý (3) aýdandarynda tirkelgen. Negizinen aýrý eresekter arasynda kóp. Eresekter arasynda ınfektsııa kózderi men berilý joldary 65-ten 17 jaǵdaıda anyqtaldy, operatsııalar – 6 jaǵdaı, qan quıý – 1, emhanalyq aralasý – 5, jynystyq jol – 2, esirtki – 2, ádet-ǵuryp - 1. Baılanysta bolǵan 60 adamnyń arasynda ınfektsııa juqtyrǵany anyqtalǵan joq», - dedi Aqmola oblystyq sanıtarııalyq-epıdemıologııalyq baqylaý departamentiniń baspasóz qzymetinen.

V jáne S gepatıtiniń vırýstary tipti az mólsherde juqtyrǵan qan arqyly beriletinin bilý kerek. Vırýstyń enýi úshin jara, syzattar, ınektsııa nemese kesý jetkilikti. Infektsııa pırsıng, tatýırovka, manıkıýr, pedıkıýr, qulaqty durys emes nemese durys óńdelmegen quraldarmen tesý kezinde paıda bolýy múmkin ekenin bilý kerek.

«Osy rette, baýyrdyń qabynýy (gepatıt) baýyr ulpasyna zııan keltiretin ártúrli faktorlardan týyndaýy múmkin ekenin eske salǵymyz keledi. Juqpaly gepatıt - lastanǵan tamaq, sý, turmystyq zattar arqyly A jáne E gepatıti vırýstarynyń aǵzaǵa enýine baılanysty baýyr jasýshalarynyń zaqymdanýy. V, S, D, F, G gepatıtiniń vırýstary juqtyrǵan qanmen baılanysta bolǵan kezde beriledi», - dep tolyqtyrdy vedomstvodan.

Departament mamandary gepatıt vırýsyn juqtyrýǵa kúdik bolǵan kezde dárigerge dereý qaralý qajettigin eske salady.

«Ózin-ózi emdeýge bolmaıdy, sozylmaly gepatıtti emdeýdi tek dáriger júrgizýi tıis. Aýrýdy emdeý qıyn, uzaq jáne qymbat bolatyn kezeńge deıin sozbaı, ýaqtyly emdelý kerek. Dıagnostıka men emdeýdiń zamanaýı deńgeıi vırýstyq gepatıtterdi anyqtaýǵa jáne onymen kúresýge múmkindik beredi. Parenteraldi gepatıtterdi ýaqtyly anyqtaý jáne olardy tıimdi emdeý –saýyǵýdyń jáne asqynýlardyń damýy bolmaýynyń kepili», - dep túıindedi vedomstvodan.

Aıta ketsek, budan buryn Aqmola oblysynda jyl basynan beri 21 adam salmonellez ınfektsııasyn juqtyrǵanyn jazǵan edik.