Aqmola oblysynda et ónimderiniń 12 paıyzy sapasyz ekeni anyqtaldy

KÓKShETAÝ. QazAqparat - Aqmola oblysynda 2022 jyldyń 1 jartyjyldyǵynda et jáne et ónimderiniń sapasy men qaýipsizdigine júrgizilgen monıtorıng qorytyndysy shyǵaryldy, dep habarlaıdy QazAqparat tilshisi.

Oblystyq sanıtarııalyq – epıdemıologııalyq baqylaý departamenti baspasóz qyzmetiniń málimetinshe, ónim qaýipsizdiginiń monıtorıngi QR sanıtarııalyq-epıdemıologııalyq baqylaý komıtetiniń 2022 jyldyń 1 jartyjyldyǵyna arnalǵan jospar-kestesine sáıkes júrgizilgen.

«Ónim qaýipsizdiginiń monıtorıngi boıynsha óńirde et ónimderiniń 186 úlgisi iriktelip alyndy, onyń ishinde 23 synama (12,4 paıyzy) KO TR talaptaryna sáıkes kelmegen. Onyń ishinde mıkrobıologııalyq kórsetkishter boıynsha sáıkes kelmegeni - 8 synama (4,3%), ónimdi tańbalaý boıynsha - 8 synama (4,3%) (saqtaý sharttary, óndirilgen kúni, jaramdylyq merzimi, memlekettik til jáne ónim aınalymynyń biryńǵaı belgisi týraly aqparattyń bolmaýy), fızıkalyq-hımııalyq kórsetkishter boıynsha - 4 synama (2,2%), ózge kórsetkishter boıynsha (tutynýshyny aldaý) - 3 synama (1,6%) bar», - dedi vedomstvodan.

Osy rette, Aqmola oblysynyń sanıtarııalyq-epıdemıologııalyq baqylaý departamentiniń mamandary et taǵamdaryn daıyndaý kezinde búliný belgileri bar eti (taıǵaq beti, jaǵymsyz, tán emes ıis) paıdalanbaý, eritilgen etti ekinshi ret qatyrýǵa jol bermeý, saqtaý sharttaryna mán berý (tońazytqyshtyń bir sóresinde shıki etti jáne tutynýǵa daıyn ónimderdi saqtamaý), etti muqııat qaınatý jáne qýyrý tárizdi birqatar erejelerdi saqtaýdy, sondaı-aq, tamaq daıyndaý protsesinde jeke gıgıena erejelerine nazar aýdarýdy usynady.

Aıta ketsek, budan buryn Aqmola oblysyndaǵy 50 balabaqshada sanıtarlyq talaptardyń saqtalmaǵany anyqtalǵan edi.