Aqmola oblysynda esirtki saıttaryn jarnamalaǵan eki petropavldyq sottaldy

KÓKShETAÝ. QazAqparat – Aqmola oblysynyń aýmaǵynda esirtki saıttaryn nasıhattap, zańsyz jarnamalaǵany úshin Petropavl qalasynyń eki turǵyny bas bostandyǵynan aıyryldy, dep habarlaıdy QazAqparat tilshisi.

Aqmola oblystyq PD baspasóz qyzmetiniń málimetinshe, qylmysty Ereımentaý qalalyq krımınaldyq polıtsııa bóliminiń qyzmetkerleri anyqtady. Petropavl qalasynyń 23 jastaǵy turǵyny men onyń 20 jastaǵy tanysy esirtki zattaryn satýmen aınalysatyn saıttyń zańsyz jarnamasyn nasıhattaý jáne ornalastyrý maqsatynda Aqmola óńiriniń aýmaǵyna arnaıy kelgen. Olardan zattaı dáleldemeler retinde trafaretter men aerozoldik búrikkishter tárkilendi.

Alǵashqy tergeý áreketteri barysynda jastar óz kinásin moıyndamady, tergeýshilerge saıttyń taqyryptyq baǵyty týraly bilmegenin aıtyp aqtalmaq bolady. Alaıda er adamnyń telegramm qosymshasy arqyly joǵary aqy tólenetin jumys taýyp, keıin óziniń tanysyn tartqany anyqtaldy. Olardyń mindeti tyıym salynǵan preparattardy nasıhattaıtyn jáne satatyn saıttarǵa siltemelerdi taratý boldy. Olarǵa «jumys berýshisi» ár jazba úshin belgili bir aqy tóleýge ýáde etken.

«Sot úkimine sáıkes, esirtki zattaryn zańsyz jarnamalaýdy nasıhattaǵany úshin (QR QK 299-1-baby) Petropavl qalasynyń 23 jastaǵy turǵyny men onyń 20 jastaǵy sybaılasyna 3,5 jáne 3 jylǵa bas bostandyǵynan aıyrý jazasy taǵaıyndaldy. Sottalýshylar jazasyn ortasha qaýipsizdik qylmystyq-atqarý júıesi mekemesinde óteıtin bolady», - dedi vedomstvodan.

Aıta ketsek, budan buryn sıntetıkalyq esirtki shyǵaratyn eki iri oshaq anyqtalyp, jumysy toqtatylǵanyn jazǵan edik.