Aqmola oblysynda Esil ózeninde balyqtyń qyrylýy sebebi anyqtalyp jatyr

KÓKShETAÝ. QazAqparat - Esil oblysaralyq basseındik balyq sharýashylyǵy ınspektsııasynyń mamandary Tselınograd aýdany Zelenyı Gaı aýylynyń mańynda Esil ózeninde balyqtyń qyrylýy sebebin anyqtap jatyr, dep habarlaıdy QazAqparat tilshisi.

Esil oblysaralyq basseındik balyq sharýashylyǵy ınspektsııasy mamandarynyń málimetinshe, Zelenyı Gaı aýylynyń mańyndaǵy Esil ózeninde balyqtyń qyrylýy týraly aqparat BAQ jarııalanǵan.

Osyǵan baılanysty Astana qalasy boıynsha balyq ınspektsııasy bóliminiń qyzmetkerleri atalǵan orynǵa shyqty. Esil ózeniniń jaǵalaýyn vıdeo avtorymen birge zertteý barysynda Zelenyı Gaı aýylynyń mańynda ólgen balyq tabylǵan joq, shamasy, ony balyq jeıtin qustar men janýarlar jep qoıǵan.

«Balyqtardyń qyrylýynyń boljamdy sebebi Esil ózenindegi sý deńgeıiniń tómendeýine baılanysty sýda erigen otteginiń azaıýynan jáne joǵary aýa temperatýrasy men sý ósimdikteriniń gúldenýi balyqtardyń tirshilik etý ortasyna keri áser etýinen bolýy múmkin. Osyǵan baılanysty zerthanalyq zertteýler júrgizý úshin Esil ózeninen sý synamalary alyndy. Balyqtardyń qyrylýynyń ózge sebepteri anyqtalǵan jaǵdaıda qosymsha aqparat usynylatyn bolady», - dep túsindirdi QazAqparat tilshisiniń saýalyna vedomstvonyń baspasóz qyzmetinen

Aıta ketsek, budan buryn Aqmola oblysynda 700-ge jýyq maldan brýtsellez belgileri anyqtalǵanyn jazǵan edik.