Aqmola oblysynda erte temir dáýirindegi qylysh tabyldy
Aqmola oblysy mádenıet, arhıvter men qujattamalar basqarmasynyń janyndaǵy Tarıhı-mádenı murany qorǵaý jáne paıdalaný ortalyǵy dırektorynyń mindetin atqarýshy Serik Ysqaqovtyń aıtýynsha, 2020 jyldyń maýsym aıynda josparǵa saı jańa arheologııalyq obektilerdi anyqtaý maqsatynda Atbasar aýdanynda barlaý jumystaryn júrgizildi.
«Barlaý jumystary kezinde Atbasar aýdanynda 100-den asa arheologııalyq nysandar ornalasqan, arheologııalyq barlaý jumystarynyń arqasynda qola jáne erte temir dáýirine jatatyn taǵy 20-ǵa jýyq jańa arheologııalyq eskertkishter anyqtaldy. Eskertkishterdi vızýaldy qaraý kezinde qorǵannyń ortasynda temir suqpanyń ushy baıqaldy, ári qaraı qazba kezinde 0,30 sm. tereńdikte temir qylysh tabyldy. Qylyshtyń jalpy uzyndyǵy 79 sm tutqasynyń uzyndyǵy 6,5 sm, qalyńdyǵy 0,4 – 0,8 sm, eni 0,7 – 2,8 sm. Qylyshtyń ushy 14 sm, eki jaǵy da ushtalǵan, suqpasy 58 sm, bir jaǵy ushtalǵan, ústi tot basqan, saqtalýy ortasha. Tuspasy men suqpa tusynda uzyndyǵy 11,5 sm, qalyńdyǵy 0,1 – 2 sm, eni 0,5 – 1 sm, tireýish bekitilgen. Qylyshtyń ortańǵy jáne ushy maıysqan, bálkim aýyr tastardyń salmaǵynan bolar. Qylyshtyń pishini men anyqtalǵan ornyna qaraǵanda, Soltústik Qazaqstan jerin erte temir dáýirin mekendegen taıpalardyń dástúrin sıpattaıdy», - deıdi Serik Ysqaqov.
Osy rette, ortalyq basshysy atap ótkendeı, Magdalınovka V qorymy Magdalınovka aýylynan batysqa qaraı 1,3 km, Esil ózeniniń sol jaǵalaýynan 300m jerdegi bıik qyrdyń ústinde ornalasqan. Qorym alǵash ret 1992 jyly anyqtalyp, 2006 jyly A.A. Pleshakovtyń jetekshiligimen SQAE qaıta zerttelgen. 2020 jyly Aqmola oblysy mádenıet, arhıvter men qujattamalar basqarmasy «Tarıhı-mádenı murany qorǵaý jáne paıdalaný ortalyǵy» KMM-men Atbasar aýdanynyda jańa arheologııalyq obektilerdi anyqtaý maqsatynda barlaý jumystar kezinde qaıta zertteldi.