Aqmola oblysynda densaýlyq nysandarynyń 87,9% ınternetke qosylǵan

KÓKShETAÝ. QazAqparat – Aqmola oblysynda 562 densaýlyq saqtaý nysanynyń 494 nemese 87,9 paıyzy ınternet jelisine qosylǵan. Bul týraly oblystyq densaýlyq saqtaý basqarmasy basshysynyń mindetin atqarýshy Bıbigúl Omarova málim etti, dep habarlaıdy QazAqparat tilshisi.

Basqarma basshysynyń sózinshe, búgingi tańda oblystyń medıtsına uıymdary 20-ǵa jýyq aqparat júıesin paıdalanady. Jalpy, osy baǵytta Densaýlyq saqtaý mınıstrligi «tsıfrlyq erkindik» qaǵıdatyn iske asyrýdy qamtamasyz etýdi josparlap otyr. Bul medıtsınalyq aqparat júıesi arasynda derekterdi joǵaltpaı almasýǵa múmkindik beredi.

«Aqmola oblysynda densaýlyq saqtaý nysandarynyń 494 nemese 87,9 paıyzy ınternet jelisine qosylǵan. Onyń ishinde aýdandyq deńgeıge deıin 38 medıtsınalyq uıym 100 paıyz, aýdandyq deńgeıden tómen 474 nysan nemese 90,4 paıyz ınternetke qosylǵan. Máselen, búgingi tańda «Damýmed» mobıldik qosymshasynyń paıdalanýshylary 203 511 adamdy quraıdy. Bul ınternet qoldanatyn belsendi halyqtyń 58,8 paıyzy (345 952 adam). Sonymen birge toltyrylǵan óńirlik elektrondy densaýlyq pasporttarynyń sany 767 960 adamdy nemese tirkelgen halyq sanynyń 98 paıyzyn qurap otyr. Osy baǵytta naýqastar úshin 24 tsıfrlyq saýattylyq beketi qurylyp, jumys istep tur», - deıdi Bıbigúl Omarova.

Densaýlyq pasporty arqyly vaktsınatsııa pasportyn, klınıkalyq qyzmet kórsetý nátıjelerin, jazylǵan retseptilerdi, klınıkalarǵa dıagnostıka qyzmetterine joldamalardy, medıtsınalyq shaǵymdar týraly anyqtamany júkteýge bolady.

«Medıtsınalyq aqparat júıelerine sáıkes aǵymdaǵy jyldyń 10 aıynda 6,9 mıllıard teńge somasyna 147,5 myń naýqas (2021 jyly - 4,5 mıllıard teńge somasyna 141,6 myń naýqas) tegin dárilik zattarmen qamtamasyz etildi», - dep tolyqtyrdy Bıbigúl Omarova.