Aqmola oblysynda Botaı mádenıetine tıesili biregeı artefaktiler tabyldy
«Botaı» memlekettik tarıhı-mádenı mýzeı-qoryǵynyń dırektory Qýanysh Shaqshaqovtyń aıtýynsha, «Botaı qonysyndaǵy arheologııalyq ǵylymı-eksperımenttik zertteýler jáne Botaı mádenıeti tasymaldaýshylarynyń qamtamasyz etý júıelerin, ómir saltyn jáne dúnıetanymdyq-kıeli konteksterin modeldeý» jobasy sheńberinde 2022 jylǵy 1 maýsymnan bastap Zerendi aýdanynyń Krasnoıar aýylynyń janyndaǵy Krasnoıar qonysynda arheologııalyq qazba jumystar júrgizilýde. Krasnoıar qonysyn arheolog Vıktor Fedorovıch Zaıbert 1986 jyly ashyp, ózi 1987 jyly zerttegen.
«Arheologııalyq zertteýler 2021 jyly bastaldy, sodan keıin 148 sharshy metrge qazba jumystary júrgizildi. Mundaǵy maqsat – ǵylymı ádister, janama belgiler men uqsastyqtar arqyly ejelgi botaılyqtardyń artefaktilerin, nanymdaryn jan-jaqty jáne egjeı-tegjeıli zertteý. Sondaı-aq, botaılyqtardyń alǵashqy (protofılosofııalyq), jartylaı mıstıkalyq ómirlik kózqarastaryn, ómir saltyn zertteý. Ekspedıtsııanyń ekinshi mindeti – Qazaqstannyń soltústik óńirindegi Botaı mádenıetiniń taralý aımaǵyn, biregeı arheologııa eskertkishterin zertteý», - deıdi Qýanysh Shaqshaqov.
«Botaı» memlekettik tarıhı-mádenı mýzeı-qoryǵynyń dırektory atap ótkendeı, arheologııalyq qazba jumystary barysynda eki turǵyn úıdiń sulbasy anyqtaldy. Olar ári qaraı zerttelmekshi. Tabylǵan zattardyń arasynda shaqpaq, súıek jáne qyshtan jasalǵan artefaktiler bar.
«Botaı mádenıetiniń eneolıttik qonystarynyń kóptegen artefaktileri botaılyqtardyń keshendi kóp salaly sharýashylyǵynyń bolǵandyǵyn aıǵaqtaıdy. Arheologııalyq zertteýler barysynda qyrǵyshtar, balta, jebelerdiń ushtary, darts, pyshaqtar, keramıka fragmentteri sııaqty tarıhı qundy jádigerler tabyldy. Olardyń arasynda botaılyqtar balyq aýlaý úshin paıdalanǵan súıek shanyshqy (garpýn), aǵash óńdeý úshin paıdalanatyn tas balta, súıekten jasalǵan pyshaq jáne eneolıt kezeńindegi taıpalardyń dúnıetanymdyq kózqarastaryn júzege asyratyn jylqynyń oıý-órnegi bar», - dep tolyqtyrdy Qýanysh Shaqshaqov.
Aıta ketsek, budan buryn Aqmolada arheologııalyq zertteý kezinde sarmat dáýiriniń «qurbandyq tasy» tabylǵan edi.