Aqmola oblysynda bıznes pen ınvestıtsııalar jemqorlyqtan qorǵalady

KÓKShETAÝ. QazAqparat – Aqmola oblysynda «Bıznes pen ınvestıtsııalardy qorǵaý» jobasy aıasynda «Anticor ortalyǵy» servıstik ǵımaratynyń alańynda sybaılas jemqorlyqtan qorǵaý týraly 10 ınvestormen kelisimge qol qoıyldy.

Bul týraly QazAqparat QR Sybaılas jemqorlyqqa qarsy is-qımyl agenttigi Aqmola oblysy boıynsha departamentiniń baspasóz qyzmetine silteme jasap habarlaıdy.

Shara barysynda bıznes ókilderi kásipkerlerge kórsetilgen senim men ózara yntymaqtastyǵy úshin Aqmola oblysynyń Sybaılas jemqorlyqpen kúres qyzmetine alǵysyn bildirdi. Óz kezeginde aýmaqtyq departament basshysy Murat Tóleýbaev sheneýnikter tarapynan qandaı da bir zańsyz áreketter nemese qysym jasalǵan jaǵdaıda bıznesmender ózderiniń zańdy quqyqtary men múddelerin qorǵaý úshin kez kelgen ýaqytta sybaılas jemqorlyqpen kúres qyzmetine habarlasa alatynyn atap ótti.

«Óz kezeginde, bıznestiń árbir ókili úshin óz isin adal jáne parasatty júrgizý norma bolýy tıis», - dedi Murat Tóleýbaev.

Búgingi tańda joba aıasynda Aqmola oblysynda 39 kásiporyn 1,2 trıllıon teńgeden astam somaǵa sybaılas jemqorlyqtan qorǵaý sharalarymen qamtylǵan.

Kezdesý barysynda Zerendi aýdanynyń «Jaqsylyk Agro», JShS, «Bereket 2050» JShS, Býrabaı aýdanynyń «Arman Taı SK», JShS, «Altyn kún-Qaz» JShS, Tselınograd aýdanynyń «Murtuk 2017» JShS, Stepnogorsk qalasynyń «Biotron Group» JShS, «Astana Nan Chemicals» sııaqty kásiporyndar ákimshilik kedergilerdiń aldyn alý jáne qolaıly iskerlik klımat qurýdan úmitti ekenin jetkizdi.

Sondaı-aq, Departament ártúrli máseleler boıynsha kásipkerlerdiń ótinishterin turaqty negizde qarap, quqyqtyq kómek kórsetedi. «Protecting Business and Investments» jobasyn iske asyrý sátinen bastap 41 ótinish kelip tústi, onyń 18-i kásipkerlerdiń paıdasyna sheshildi, 23 ótinish boıynsha tıisti túsiniktemeler berildi.