Aqmola oblysynda bir úıdiń eki balasy tútinge tunshyǵyp qaldy

KÓKShETAÝ. QazAqparat – Aqmola oblysynyń Jaqsy aýdanynda sirińkemen oınaǵan bir úıdiń eki balasy tútinge tunshyǵyp, kóz jumdy, dep habarlaıdy QazAqparat tilshisi.

Oblystyq tótenshe jaǵdaılar departamenti baspasóz qyzmetiniń málimetinshe, qaıǵyly jaǵdaı búgin, tamyzdyń 11-de Jańa Qıma aýylynda boldy.

«Anyqtalǵandaı, úıde eresekterdiń qaraýynsyz qalǵan 3 jáne 5 jastaǵy eki bala sirińkemen oınaǵan. Saldarynan úıdegi jıhaz órtengen. Úıden tútin shyǵyp jatqanyn kórshisi baıqap qalǵan. Ol dereý terezeni syndyryp, balalardy syrtqa shyǵardy jáne órt sóndirýshilerge habarlady. Shaqyrý ornyna Jańa Qıma aýylyndaǵy 28-shi órt sóndirý beketinen 3 adam jáne 1 órt sóndirý tehnıkasy shyqty. Órt sóndirý qyzmeti oqıǵa ornyna 5 mınýt ishinde jetti. Alaıda, tútinnen ýlanǵan balalar Qıma aýyldyq emhanasyna dereý jetkizilgenimen, esterin jımastan kóz jumdy», - dedi vedomstvodan.

Sonymen birge, vedomstvodan atap ótkendeı, qaıǵyly oqıǵa kezinde balalardyń ákesi jumysta bolǵan, al anasy dúkenge shyǵyp ketken.

Aıta ketsek, Aqmolada balalar lagerlerinde órt qaýipsizdigi erejeleriniń saqtalmaǵany anyqtalǵan bolatyn.