Aqmola oblysynda bes kúnde 1 383 túlek UBT tapsyrdy

KÓKShETAÝ. QazAqparat – Aqmola oblysynda ótinish bildirgen 3718 túlektiń bes kún ishinde 1383-i testileýden ótti. Bul týraly oblystyq bilim basqarmasynyń jalpy-orta jáne mektepke deıingi bilim bóliminiń basshysy Aınagúl Súleımenova aıtty, dep habarlaıdy QazAqparat tilshisi.

Bólim basshysynyń aıtýynsha, oblysta UBT tapsyratyn 11 pýnkt jumys isteıdi. Onyń úsheýi Nur-Sultan qalasynyń joǵary oqý oryndarynda uıymdastyrylǵan, onda Arshaly, Qorǵaljyn jáne Tselınograd aýdandarynyń túlekteri test tapsyrýda.

UBT tapsyrý barysynda sanıtarlyq talaptar qatań saqtalǵan.

«UBT tapsyrýǵa ótinish bildirgen 3718 túlektiń bes kún ishinde 1383-i testileýden ótti. Qatysýshylardy testileýge jiberý barysynda 11 túlek telefon jáne shpargalka ákelgeni úshin testileýge jiberilmedi. 13 túlek - ereje buzǵany úshin, ekeýi - dene qyzýy kóterilgendikten testileýge jiberilmedi», - deıdi Aınagúl Súleımenova.

Ol atap ótkendeı, UBT tapsyrǵandardyń arasynda Stepnogor qalasyndaǵy №4 negizgi orta mektep-ınternatynyń túlegi Dıas Óndiris eń joǵary 128 ball jınady.

Óńirde UBT tapsyrý on kún boıy maýsymnyń 30-na deıin jalǵasady.

Eske sala keteıik, jalpy bıyl Aqmola oblysynda 4515 túlek mektep bitirse, onyń 3718 UBT tapsyrýǵa ótinish bergen.