Aqmola oblysynda belgisiz úsheý jergilikti turǵyndy qorqytyp, oǵan eki nesıe rásimdetken

ASTANA. QazAqparat – Aqmola oblysynda jergilikti turǵyndy qorqytyp, eki nesıe rásimdetkender ustaldy, dep habarlaıdy QazAqparat Polisia.kz-ke silteme jasap.

Bul týraly oblystyq Polıtsııa departamentine Kókshetaý qalasynyń 22 jastaǵy turǵyny habarlaǵan.

Turǵynnyń aıtýynsha, belgisiz úsh jigit ony páterge kúshpen kirgizip, denesine zaqym keltirip, keıin pyshaqpen qorqytyp, úlken mólsherde qarajat talap etken.

Jaǵdaıdy egjeı-tegjeıli anyqtaǵan jedel ýákilder jábirlenýshiniń buǵan deıin VKontakte áleýmettik jelisinde qyzben tanysqanyn anyqtaǵan. Al alǵashqy kezdesýden keıin ony belgisiz úsh adam ustap alyp, aqsha talap etken. Jábirlenýshide talap etilgen soma bolmaǵandyqtan, kúdiktiler onyń telefonyndaǵy bankterdiń qosymshalary arqyly eki onlaın-nesıe rásimdep, aqshany bankomattardan sheship alǵan.

Ózine kúsh kórsetkenderge qolma-qol aqsha bergen jas jigit birden polıtsııaǵa júgindi. Atalǵan derek QR QK-niń 194-baby 2-bóligi (Qorqytyp alý) boıynsha sotqa deıingi tergep-tekserýlerdiń biryńǵaı tiziliminde tirkeldi.

Kókshetaýda arnaıy operatsııa nátıjesinde uıymdasqan qylmysqa qarsy kúres basqarmasynyń qyzmetkerleri kúdiktilerdi ustady.

Atalǵan toptyń kóshbasshysy retinde oblys ortalyǵynyń 25 jastaǵy turǵynyna «qamaýda ustaý» bultartpaý sharasy qoldanyldy. Qalǵan eki kúdiktige de qatysty shara qoldanylyp, qylmystyq is tergelip jatyr.

Foto: polisia.kz