Aqmola oblysynda bannerdegi QR-kod esirtki saıtyna baǵyttaǵan

KÓKShETAÝ. QazAqparat – Býrabaıdaǵy Abylaı han alańynda ornatylǵan taqtaıshanyń QR-kody esirtki saıtyna baǵyttaǵan. Bul týraly áleýmettik jeli qoldanýshylary jazdy, dep habarlaıdy QazAqparat tilshisi.

QazAqparat tilshisi Býrabaı aýdany ákimdiginen habarlasyp, osy máseleniń anyq-qanyǵyn surap bildi.

«Bul bılbord 2018 jyly ornatylǵan. Onda Býrabaı aýdanynyń kıeli nysandary týraly barlyq málimet bar. Málimetter – tarıhı-mádenı murany qorǵaý jáne paıdalaný ortalyǵynyń saıtyndaǵy resmı derekkózder. 2021 jyly bul taqtaısha jańartyldy. Biraq aqparat ózgerissiz qaldy. Jańartýǵa tapsyrys berýshi mádenıet bólimi boldy, al ony jasaýshy – jergilikti jarnama agenttigi. Biz QR kodyna ne bolǵanyn bilmeımiz. Bálkim, qandaı da bir aqaý týyndaǵan shyǵar. Óıtkeni, bastapqyda bári tekserilgen, durys boldy. Alańda adamdar kóp, olardyń kóbi osy málimetterdi oqıdy, ózimizde jıi qarap otyramyz. Bul jaqynda bolǵan aqaý», - dep túsindirdi Býrabaı aýdandyq ákimdiginen.

Qazir polıtsııa qyzmetkerleri QR-kodty aýystyrý máselesimen aınalysyp jatyr. Al aýdandyq mádenıet bólimi QR-kody bar jańa bılbord ornatyp, málimetterdi jańartty. Onda tarıhı-mádenı murany qorǵaý jáne paıdalaný ortalyǵynyń qajetti saıty ashylady.

Aıta ketsek, budan buryn Kókshetaýda esirtki tasymaldaǵan astana turǵyny 11 jylǵa sottalǵanyn jazǵan edik.