Aqmola oblysynda balyqshylardan para alyp kelgen ınspektor aıyppul tóleıdi

KÓKShETAÝ. QazAqparat - Aqmola oblysynda birneshe ret para alǵan balyq qorǵaý ınspektory men oǵan para bergen balyqshylarǵa sot úkimi shyqty, dep habarlaıdy QazAqparat tilshisi.

Aqmola oblystyq soty baspasóz qyzmetiniń málimetinshe, sotta birneshe ret para alǵan balyq ınspektsııasy bóliminiń basshysyna, laýazymdy tulǵaǵa birneshe ret para bergen eki balyqshyǵa qatysty Qylmystyq kodekstiń 366-babynyń 3-bóligi, 367-babynyń 3 jáne 1 bólikteri boıynsha qylmystyq is qaraldy.

«Sotta anyqtalǵandaı, baqylaýshy memlekettik organ qyzmetkeri eki balyqshyǵa Zerendi aýdanynyń Myrzakólsor kólinde tyıym salynǵan qural túrlerimen balyq aýlaǵa birneshe ret ruqsat bergen. Sol úshin ol balyqshylardan aı saıyn 20 000 jáne 30 000 teńge kóleminde para alyp otyrǵan», - dedi vedomstvodan.

Sottalýshylar kinásin moıyndady, dálelderdi joqqa shyǵarmaı, istegen isine ókindi.

«Sot úkimimen balyq qorǵaý ınspektoryna 6 090 000 teńge, eki balyqshynyń árqaısyna 2 100 000 jáne 900 000 teńgeden aıyppul salyndy. Sonymen birge ınspektor memlekettik qyzmette qyzmet atqarý quqyǵynan ómir boıyna aıyryldy», - dep tolyqtyrdy vedomstvodan.

Sot úkimi zańdy kúshine engen joq.

Aıta ketsek, budan buryn Aqmola oblysynda laýazymdy tulǵaǵa para bergen ákimniń sottalǵanyn jazǵan edik.