Aqmola oblysynda balabaqshadaǵy balalar sanyn 25-ke deıin arttyrýǵa ruqsat etildi

KÓKShETAÝ. QazAqparat - Aqmola oblysynyń bas memlekettik sanıtarlyq dárigeri Aınagúl Mýsınanyń 10 naýryzdaǵy qaýlysymen aımaqtaǵy karantındik shekteý sharalaryna ózgerister men tolyqtyrýlar engizildi. Olar negizinen mektepke deıingi mekemelerdiń jumysyna qatysty, dep habarlaıdy QazAqparat tilshisi.

Osy qaýlyǵa sáıkes, Aqmola oblysynda buqaralyq is-sharalardy ótkizýge, oıyn-saýyq mekemeleriniń (karaoke, bılıard, kompıýterlik klýbtar, túngi klýbtar, boýlıng ortalyqtary, jabyq úı-jaılardaǵy balalardyń oıyn alańdary men attraktsıondary, batýttar jáne basqalar), býkmekerlik keńseler men eresekterge jáne balalarǵa arnalǵan basqa da oıyn-saýyq mekemeleriniń, kalıan, banket zaldarynyń qyzmetine, merekelik korporatıvtik keshterdi uıymdastyrý men ótkizýge, kórermendermen sporttyq is-sharalar ótkizýge tyıym saqtalady.

Jańa qaýlydaǵy ózgerister mektepke deıingi balalar mekemelerine qatysty: balabaqshalardyń kezekshi toptarynda endi 15 emes, 25 adamǵa deıin ruqsat etiledi.

Sondaı-aq qalaaralyq avtobýs, shaǵyn avtobýs tasymaldarynyń, qalalyq turaqty emes tasymaldardyń qozǵalysy jandanady. Bul rette, tolymdyq oryndar sanynyń 75 paıyzynan aspaýy, biraq 15 adamnan artyq bolmaýy qajet. Osyndaı sharttarmen oblysaralyq jáne qalalyq turaqty emes (týrıstik) tasymaldardyń qozǵalysyna da ruqsat etilip otyr.

Ashyq jáne jabyq azyq-túlik jáne azyq-túlik emes bazarlardyń (saýda úıleriniń, saýda ortalyqtarynyń, pavılondardyń, dúkenderdiń jáne bazarlardyń tıpi boıynsha basqalarynyń) qyzmetine ruqsat saqtalyp otyr. Talap: 1 adamǵa 4 sharshy metr aýmaqtan kelýi tıis jáne býtıkterde áleýmettik qashyqtyq saqtalýy qajet.

Ashanalarda ústelder arasyndaǵy qashyqtyq 2 metrden kem emes jáne kelýshiler arasynda 1 metrden kem emes bolýy qajet. Tolymdyq 50 paıyzǵa deıin jáne otyratyn oryn sany 50-den aspaýy tıis. Nysandardyń jumysyna saǵat 07.00-den 00.00-ge deıin ruqsat. Alaıda, saltanatty, otbasylyq, estelik, ujymdyq is-sharalar jáne adamdar kóp jınalatyn basqa da is-sharalardy ótkizýge tyıym salynady.

Sonymen qatar, 2020-2021 oqý jylynyń úshinshi toqsanyna qatysty sheshimder saqtalyp otyr: 300 oqýshyǵa deıingi kontıngenti bar, synyptardaǵy balalar sany 15 adamnan aspaıtyn qalalyq jáne aýyldyq mektepterde dástúrli formatta oqýǵa ruqsat etiledi. 2021 jylǵy 1 naýryzdan bastap oqytý mektepaldy synyptardyń oqýshylary úshin jalpy bilim beretin mektepterde 1–den 5-synypty qosa alǵanda, halyqaralyq mektepterde 1-den 7-synypty qosa alǵanda, synyptardaǵy balalar sany 25 adamnan aspaıtyn aralas formatta júrgiziledi.

Mektep bitirýshi synyptar (9, 11 (12) synyptar) aptanyń 6 kúninde aralas formatta oqıdy. Bul rette oqýshylardyń 70 paıyzy pánderdi shtattyq rejımde, 30 paıyzy qashyqtan (synypta 15 adamnan artyq emes, «1 synyp – 1 kabınet» qaǵıdaty boıynsha oqytý, sanıtarlyq-dezınfektsııalyq jáne maskalyq rejımderdi saqtaý) bilim alady.

Sabaqtan tys ýaqytta 15 adamnan aspaıtyn toptarda oqýshylardy jeke oqytý bilim berý uıymy ákimshiliginiń sheshimi boıynsha uıymdastyrylady.