Aqmola oblysynda «Aýyl – El besigi» jobasy qalaı júzege asyrylýda

KÓKShETAÝ. QazAqparat - Aýyl turǵyndarynyń ómir súrý deńgeıin arttyrý úshin elimizde «Aýyl – El besigi» arnaıy jobasy iske asyrylýda. Onyń negizgi mindetteri – aýyldyq aýmaqtardyń áleýmettik jáne ınjenerlik ınfraqurylymyn jańǵyrtý, olardy óńirlik standarttar júıesiniń parametrlerine keltirý. Aqmola oblysynda jobany tıimdi ilgeriletý maqsatynda 2025 jylǵa deıingi jeke jospar-kestesi ázirlendi. Bul qujat ártúrli jobalar iske asyrylatyn aýyldyq eldi mekender boıynsha málimetterdi qamtıdy, dep habarlaıdy QazAqparat tilshisi oblystyq ishki saıasat basqarmasyna silteme jasap.

Oblystyń ekonomıka jáne bıýdjettik josparlaý basqarmasynyń deregi boıynsha, 2019-2020 jyldary óńirde 72 joba iske asyryldy. Bul, 15 aýyldyń 80 myńǵa jýyq turǵynynyń ómir súrý sapasyn jaqsartýǵa múmkindik berdi. Baǵdarlama sheńberinde jalpy uzyndyǵy 120 shaqyrym kentishilik joldar jóndeldi, Zerendi jáne Bulandy aýdandarynyń Vıktorovka aýyldarynyń eki myńnan astam turǵyny sapaly ortalyqtandyrylǵan sýǵa qol jetkizdi, Astrahanka aýylynda ınjenerlik jelileri bar qazandyq, Arshaly kentinde 88 adam qabyldaıtyn basseıni bar dene shynyqtyrý-saýyqtyrý kesheni salyndy, jylýmen jabdyqtaý jelilerine, kósheni jaryqtandyrýǵa jáne basqa da kóptegen obektilerge jóndeý júrgizildi. 844 ýaqytsha jumys orny quryldy, onyń 48-i turaqty jumys orny.

«Bıyl el Táýelsizdiginiń mereıtoılyq jylynda 27 aýylda 77 jobany iske asyrýǵa bıýdjet qarajaty bólindi. Ótken jyldarmen salystyrǵanda bólingen qarajat kólemi ulǵaıdy, qarjylandyrylatyn jobalar men aýyldyq eldi mekenderdiń sany ósti. Búgingi tańda 14 joba boıynsha jumystar aıaqtaldy. Bul Krasnoıar aýylyn jylýmen jabdyqtaýdyń syrtqy jelilerin salý, Mádenıet, Egindikól aýyldaryndaǵy joldardy ortasha jóndeý, Jaqsy, Lozovoe aýyldaryndaǵy mádenıet úıin kúrdeli jóndeý jáne joldardy ortasha jóndeý, Novoselovka aýylyndaǵy kóshe-jol jelilerin ortasha jóndeý», - dedi vedomstvodan.

Atbasar aýdanynyń Bastaý aýylynda jastardyń bos ýaqytyn ótkizý ortalyǵynyń, Jaqsy jáne Aqmol aýyldarynda eki dene shynyqtyrý-saýyqtyrý kesheniniń, Býrabaı aýdanynyń Mádenıet aýylynda sport kesheniniń qurylysy, Sandyqtaý aýdanynyń Balkashıno aýylyndaǵy stadıondy jáne basqa da nysandardy qaıta jańartý júrgizilýde. Ótkizilip jatqan is-sharalar aýyldyq aýmaqtardy damytýǵa jańa serpin berip, jalpy el ekonomıkasyna oń áserin tıgizedi.