Aqmola oblysynda aýdandyq máslıhat depýtattarynyń saılaýy ótedi

KÓKShETAÝ. QazAqparat - Bıylǵy jyldyń 25 naýryzynda Aqmola oblysynyń Astrahan, Tselınograd jáne Birjan sal aýdandarynda máslıhat depýtattarynyń saılaýy ótedi. Bul týraly óńirlik kommýnıkatsııalar qyzmetinde ótken brıfıngte  Aqmola oblystyq Saılaý komıssııasynyń tóraǵasy Ádilhan Shaıahmetov málim etti, dep habarlaıdy QazAqparat tilshisi.

Onyń aıtýynsha, saılaý naýqanyna daıyndyq sharalary men ony ótkizýge oblystyq, úsh aýmaqtyq, úsh okrýgtik jáne toǵyz ýchaskelik saılaý komıssııasy tartylǵan.

Aýdandyq máslıhat depýtattyǵyna úmitkerlerdi jiberý oblystyq Saılaý komıssııasynyń 2018 jylǵy 6  aqpandaǵy qaýlysyna sáıkes júzege asyrylady. Barlyq aýmaqtyq, okrýgtik jáne ýchaskelik saılaý komıssııalary týraly málimetter (ornalasqan jeri, telefony, saılaý komıssııasynyń quramy, okrýg shekarasy) aýdandyq buqaralyq aqparat quraldarynda jarııalanady.

2018 jyldyń 9 naýryzynan bastap, azamattardyń turǵylyqty mekenjaıy boıynsha ornalasqan saılaý ýchaskelerinde, ýchaskelik saılaý komıssııasy turǵyndarǵa saılaýshylardyń tizimin tanysýǵa usynady.

«Aýdandyq máslıhat depýtattyǵyna úmitkerlerdi jiberý belgili tártip boıynsha tirkelgen respýblıkalyq jáne jergilikti qoǵamdyq uıymdarmen, sondaı-aq qurylymdyq bólimsheler jáne azamattardyń ózin-ózi usyný arqyly júrgiziledi.  Úsh okrýg boıynsha 11 úmitker depýtattyqqa usynyldy», - dep túsindirdi Á.Shaıahmetov.

Ár saılaý okrýgi boıynsha saılaý bıýlletenderine úsh úmitker engiziledi. Ár úmitkerdiń saılaýshylarmen kezdesý kestesi kelisildi. Úmitkermen jáne onyń senimdi tulǵasymen ótkiziletin saılaýaldy úgit jumystary 2018 jyldyń 24 naýryzynda túngi saǵat 00:00-de aıaqtalady.