Aqmola oblysynda «Ashyq» júıesinde joq nysandardyń jumysyna tyıym salyndy

KÓKShETAÝ. QazAqparat - «Aqmola oblysy aýmaǵynda karantındik shekteý sharalaryn qatańdatý týraly» Aqmola oblysynyń Bas memlekettik sanıtarlyq dárigeriniń 2021 jylǵy 30 maýsymdaǵy №24 qaýlysyna ózgerister men tolyqtyrýlar engizildi, dep habarlaıdy QazAqparat tilshisi vedomstvonyń baspsóz qyzmetine silteme jasap.

Qaýlyǵa sáıkes, azyq-túlik sýpermarketteri men olardaǵy dárihanalardy qospaǵanda, aýdany 500 sharshy metrden artyq saýda oıyn-saýyq ortalyqtary, saýda úıleri, saýda ortalyqtary, azyq-túlik emes dúkender, aralas taýar dúkenderi, pavılondar (qoıma úı-jaılarynsyz jalpy aýdany eskeriledi) senbi jáne jeksenbi kúnderi jumysyn toqtady.

Sonymen birge, kelýshiler sanyn 30 paıyzdan asyrmaı jáne bir kelýshige 4 sharshy metr áleýmettik qashyqtyqty saqtaı otyryp, saýda oıyn-saýyq ortalyqtary, saýda úıleri, saýda ortalyqtary, azyq-túlik emes dúkenderine saǵat 22:00-ge deıin jumys isteýge ruqsat etiledi. Al, «Ashyq» jobasyna qatysatyn obektilerdi qospaǵanda, balalar oıyn alańdary men attraktsıondary qyzmetine tyıym salynady.

«Halyqqa qyzmet kórsetý ortalyqtary (budan ári-HQKO), onyń ishinde mamandandyrylǵan HQKO-nyń, 1414 Call-ortalyǵy jáne vırtýaldy assıstentterdiń jumys kúnderi (dúısenbi - juma) saǵat 09:00-den 18:00-ge deıin, senbi kúnderi saǵat 09:00-den 14:00-ge deıin jumys isteıdi. Kókshetaý qalasy HQKO bólimderinde, onyń ishinde mamandandyrylǵan HQKO-da azamattardy qabyldaý qatań túrde Egov.kz nemese 1414 Call-ortalyǵy aldyn ala brondaý arqyly júrgiziledi», - delingen qaýlyda.

Qaýly qol qoıylǵan kúnnen bastap kúshine enedi.