Aqmola oblysynda Alǵys aıtý kúnine oraı «Bir el-bir taǵdyr» atty forým ótti
Kókshetaý qalasyndaǵy Qoǵamdyq kelisim saraıynda Qazaqstan halqy Aqmola assambleıasynyń jumysy týraly beınefılmi jáne Nazarbaev zııatkerlik mektebi oqýshylarynyń arnaıy qoıylymdarymen ashylǵan forýmǵa memlekettik organdardyń basshylary, Qazaqstan halqy Aqmola assambleıasynyń músheleri, oblystyq etnomádenı birlestikterdiń basshylary, «Jańǵyrý joly» jastar qanatynyń ókilderi, stýdentter men oqýshylar qatysty.
«Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev 2015 jyly 1-Naýryz - Qazaqstan halqy Assambleıasynyń qurylǵan kúnin jyl saıyn barlyq etnostardyń bir-birine meıirbandyq tanytyp, ol adamdardy óz týǵanyndaı qabyldaǵan qazaqtarǵa Alǵys aıtý kúni dep ataý jóninde usynys aıtqan bolatyn. Bul mereke sodan beri qatarynan bes jyl qatarynan atalyp ótip keledi.
Bıylǵy jyly Qazaqstan halqy Assambleıasynyń qurylǵanyna 25 jyl tolyp otyr. Táýelsiz damý jyldaryn ótkergen qazaqstandyq jol - tutastyǵyn saqtamaı turaqty jáne kúshti memleket qurý múmkin emestiginiń naqty dáleline aınaldy. Bizdiń búgingi negizgi mindetimiz etnosaralyq kelisim men birlikti saqtaý jáne nyǵaıtý bolyp tabylady»,-deı kele, aımaq basshysy Ermek Marjyqpaev óńirde aqmolalyqtar tarapynan júzege asyrylyp jatqan qaıyrymdy ister týraly aıtyp ótti.
Osy rette, aýyldastarynyń ómir jaqsartýǵa atasalysyp kele jatqan Ivan Saýer, Ýálıhan Áripov, Aleksandr Zakýsılov, Jamýl Mýshanov, Vladımır Stıhılıas, Valerıı Tıýrkın, Gúlnaz Qabykeeva, Borıs Kozlov, Saıra Mataıbaeva, Altynbek Qurmankulov, Magamed Abýev sııaqty azamattardyń esimderin aıtyp, alǵys bildirdi.
Shara barysynda Qazaqstan halqy Assambleıasynyń múshesi Bolat Janádilov, Atbasar jáne Sandyqtaý aýdandaryndaǵy «Vaınah» sheshen-ıngýsh etnomádenı ortalyǵynyń aqsaqaly Áýbákir Zarahov, Qazaqstan halqy Assambleıasynyń múshesi, Astrahan aýdandyq «Maıak» gazetiniń redaktory Lıdııa Chernega, Qazaqstan halqy Aqmola assambleıasy janyndaǵy «Jańǵyrý joly» jastar qozǵalysynyń tóraǵasy Aslan Ábitálipov sóz sóılep, qıyn kezde ózge ulttardy baýyryna basqan qazaq halqyna sheksiz alǵystaryn bildirdi.