Aqmola oblysynda áleýmettik tólemder boıynsha bereshek máselesi talqylandy

KÓKShETAÝ. QazAqparat - Oblys ákimi Ermek Marjyqpaevtyń tóraǵalyǵymen áleýmettik áriptestik, áleýmettik jáne eńbek qatynastaryn retteý jónindegi oblystyq komıssııanyń kezekti otyrysy ótti, dep habarlaıdy QazAqparat tilshisi oblystyq ishki saıasat basqarmasyna silteme jasap.

Vedomstvonyń málimetinshe, áleýmettik áriptestik taraptardyń, múddeli oblystyq basqarmalar men vedomstvolardyń ókilderi, óńirlerdiń ákimderi – aýdandyq jáne qalalyq komıssııalardyń tóraǵalary – jyldyń basymen salystyrǵanda aqpannyń ekinshi onkúndiginiń sońyndaǵy áleýmettik tólemder boıynsha bereshek jónindegi jaǵdaıǵa taldaý jasady. Birqatar óńirlerde 1 qańtardan bastap mindetti zeınetaqy jarnalary, MÁMS aýdarymdary boıynsha bereshek somasy ulǵaıdy, basqalarynda, kerisinshe, tómendedi. Bıylǵy tólemderdi esepke almaǵanda bereshek 287 mıllıon teńgeni quraıdy, jyl basynan beri ol 40 mıllıon teńgege (12 paıyz) tómendedi. Áleýmettik tólemder boıynsha bereshek somasy ondaǵan mıllıonǵa esepteletin eń iri boryshker kásiporyndar ataldy.

«Barlyq aýdan ákimderi osy boryshkerlerdiń qaı aýmaqta ekenin, olardyń árqaısysymen jeke jumys isteý kerektigin estidi dep oılaımyn. Jaǵdaıdy toqsan qorytyndysy boıynsha, sodan keıin jartyjyldyq qorytyndysy boıynsha qadaǵalaıtyn bolamyz», – dep atap ótti aımaq basshysy.

Otyrysta áleýmettik tólemderdiń bereshegin óteý boıynsha jumysty uıymdastyrý, sondaı-aq oblystyń kásiporyndary men uıymdarynda jalaqyny arttyrý máseleleri talqylandy.

Otyrysty qorytyndylaı kele, Ermek Marjyqpaev mindetti zeınetaqy jarnalary men áleýmettik aýdarymdar boıynsha bereshekti óteý boıynsha jumysty turaqty negizde júrgizý týraly birqatar tapsyrmalar berdi. Aqmola oblysynyń eńbek ınspektsııasy jónindegi basqarmasy, óńirlerdiń ákimderi, jumys berýshi uıymdar jáne jumysshylarmen birlesip, aqmolalyq eńbekshilerdiń ál-aýqatyn arttyrý jónindegi qyzmetti jandandyrý tapsyryldy.