Aqmola oblysynda 800-den astam zańsyz qoqys oryndary anyqtaldy
Aqmola oblysy boıynsha ekologııa departamentiniń basshysy Qadyrhan Beısenbaevtyń málimetinshe, búgingi tańda óńirde qoqys úıindileriniń qalyptasýy ózekti másele bolyp otyr.
«Oblys boıynsha jyl saıyn ótkiziletin sanıtarlyq abattandyrý aılyǵyna qaramastan, esepke alynbaǵan stıhııalyq sanktsııalanbaǵan qoqys úıindileri kóbeıip keledi. Buǵan árıne, jergilikti atqarýshy organdar tarapynan baqylaýdyń álsizdigi jáne polıgondarda kommýnaldyq qaldyqtardy jınaý, tasymaldaý, ornalastyrý boıynsha qajetti ınfraqurylymnyń bolmaýy sebep bolyp otyr», - deıdi Qadyrhan Beısenbaev.
Departament basshysy atap ótkendeı, Qazaqstan Respýblıkasynyń Ekologııa, geologııa jáne tabıǵı resýrstar mınıstrligi men «Qazaqstan Ǵarysh Sapary «UK» AQ-men birlesip qaldyqtardy ornalastyrýdyń ruqsat etilmegen oryndaryn anyqtaý boıynsha is-sharalar júrgizýde.
2021 jyly Aqmola oblysynda 1329 zańsyz qoqys orny anyqtaldy. Bıylǵy jyly da ǵaryshtan túsirilgen sýretter negizinde óńirde 830 polıgon anyqtalyp, onyń 757 nemese 91 paıyzy joıyldy.
«Polıgondardyń paıda bolýynyń basty sebepteriniń biri-oblys aýmaǵynda qatty turmystyq qaldyqtar zańdastyrylǵan polıgondarynyń azdyǵy. Máselen, óńirde qatty turmystyq qaldyqtardy ornalastyrý úshin 130 jer ýchaskesi bólingen. Alaıda olardyń tek 24-i ǵana ekologııalyq talaptarǵa saı keledi. Oblystyń 10 aýdanynda jáne Kókshetaý qalasynda zańdastyrylǵan polıgondar múldem joq», - dep tolyqtyrdy Q.Beısenbaev.
Osy rette, Tselınograd, Arshaly, Zerendi aýdandarynda jáne Kókshetaý qalasynda ruqsat etilmegen qoqys úıindileriniń eń kóp sany anyqtalyp otyr. Onyń ishiede stıhııalyq qoqys úıindilerin joıý jóninde sharalar qoldanbaǵany úshin Arshaly jáne Birjan sal aýdandarynyń laýazymdy tulǵalary, al talaptardy saqtamaǵany úshin jeke jáne zańdy tulǵalar ákimshilik jaýapkershilikke tartyldy.