Aqmola oblysynda 8 myń gektar jer telimi memleketke qaıtaryldy

KÓKShETAÝ. QazAqparat – Jaqsy aýdanynyń prokýratýrasy jer zańnamasynyń saqtalýyna taldaý júrgizip, jergilikti fermerlerdiń aýyl sharýashylyǵy alqaptaryn paıdalanbaý derekterin anyqtady, dep habarlaıdy QazAqparat tilshisi Aqmola oblysy prokýratýrasynyń baspasóz qyzmetine silteme jasap.

Vedomstvonyń málimetinshe, taldaý qorytyndylary boıynsha aýdan ákimdigine Aqmola oblysy boıynsha jer resýrstaryn basqarý departamentine zań buzýshylyqtardy joıý týraly usynystar engizildi.

«Prokýratýra aktileri boıynsha ýákiletti jáne jergilikti atqarýshy organdar qajetti sharalardy qabyldady jáne osy jyly memleketke aýdany 8 myń ga, kadastrlyq quny 58 mln teńgeden asatyn jaıylym qaıtaryldy. Ol uzaq ýaqyt boıy tikeleı nysanaly maqsaty boıynsha paıdalanylmady», - dedi vedomstvodan.

Prokýratýranyń baspasóz qyzmetinen atap ótkendeı, paıdalanylmaıtyn aýyl sharýashylyǵy alqaptaryn qaıtarý jumystary jalǵasyp jatyr.

«Aýdan prokýratýrasynyń sharalary boıynsha ýákiletti organ 4 jer paıdalanýshyǵa jalpy aýdany 5 861 ga jer ýchaskelerine zań buzýshylyqtardy joıý týraly nusqama tabys etti. Jer paıdalanýshylar zań buzýshylyqtardy joımaǵan jaǵdaıda, ýchaskeler májbúrlep alyp qoıylady», - dep tolyqtyrdy vedomstvodan.

Aıta ketsek, budan buryn memleketke jalpy quny 1,6 mlrd teńge bolatyn orman ýchaskesi qaıtarylǵanyn jazǵan edik.