Aqmola oblysynda 5 jasar balany kólik qaqty: polıtsııa is qozǵady

KÓKShETAÝ. QazAqparat – Aqmola oblysynda 5 jasar balany kólik qaǵyp ketý oqıǵasyna baılanysty polıtsııa qylmystyq is qozǵady, dep habarlaıdy QazAqparat tilshisi oblystyq PD baspasóz qyzmetine silteme jasap.

Vedomstvonyń málimetinshe, shildeniń 20-synda saǵat 18:52-de Kókshetaý qalalyq polıtsııa basqarmasynyń kezekshi bólimine medıtsına qyzmetkeri habarlasyp, aýrýhanaǵa «jabyq bas súıeginiń synyǵy, mı shaıqalý, tómengi jaqtyń synýy, tómengi erinniń jarasy» dıagnozymen 5 jasar balanyń jetkizilgenin aıtqan.

«Anyqtalǵandaı, jol-kólik oqıǵasy ortalyq bazar aýmaǵynda bolǵan. Soltústik Qazaqstan oblysynyń 49 jastaǵy turǵyny Toyota Avensis kóligimen bazar aýmaǵynan shyǵyp bara jatyp, abaısyzda 5 jasar balany qaǵyp ketken. Soqqydan bala qulaǵan. Balanyń ata-anasy qasynda bolady. Osy oqıǵaǵa baılanysty Qylmystyq kodekstiń 345-baby boıynsha «kólik quraldaryn basqaratyn adamdardyń jol júrý nemese kólik quraldaryn paıdalaný erejelerin buzýy» boıynsha sotqa deıingi is qolǵa alynyp, saraptama taǵaıyndaldy», - dedi vedomstvodan.

Aıta ketsek, budan buryn Kókshetaýda boıjetken mektep aýlasynda asylyp qalǵanyn jazǵan edik.