Aqmola oblysynda 45 otbasy baspanaly boldy

KÓKShETAÝ. QazAqparat - Jańa jyl merekesi qarsańynda Sandyqtaý aýdanynyń ortalyǵy - Balkashıno aýylynda 45 otbasy páter kiltterine ıe boldy, dep habarlaıdy QazAqparat tilshisi oblystyq ishki saıasat basqarmasyna silteme jasap.

Jańa 45 páterli úı «Nurly jer» memlekettik turǵyn úı-kommýnaldyq qurylys baǵdarlamasy boıynsha salyndy. Baspanaly bolǵandardyń qatarynda jetim balalar, kóp balaly otbasylar, halyqtyń áleýmettik osal toptarynyń ókilderi, eńbek ardagerleri bar.

Aýdan ákimi Erbol Júsipbekov páter kiltterin jáne jańa qonystanýshylarǵa estelik syılyqtardy tabys etti. Jańa úı turǵyndaryn shyn júrekten quttyqtaı otyryp, aýdan basshysy óziniń jaıly turǵyn úıiniń bolýy qazaqstandyqtardyń ómir súrý sapasyn arttyrýdyń basty kórsetkishi bolyp tabylatynyn atap ótti.

«Turǵyn úı - halyq úshin eń mańyzdy máselelerdiń biri. Sondyqtan bizdiń memleketimizdiń saıasatynyń negizgi baǵyttarynyń biri árbir qazaqstandyq otbasyn jeke baspanamen qamtamasyz etý bolyp tabylady. El Táýelsizdiginiń 30 jyldyq mereıtoıynda biz osy mindetterdi belsendi túrde júzege asyryp jatqandyǵymyz qýantady»,-dep atap ótti aýdan ákimi.

Bıyl Sandyqtaý aýdanynda jospar boıynsha 5 myń sharshy metrden astam turǵyn úı paıdalanýǵa berildi.

Aıta keteıik, Táýelsizdik jyldary Aqmola oblysynda 7 mıllıon sharshy metr turǵyn úı salyndy, 62 myńnan astam aqmolalyq páter máselesin sheshti.