Aqmola oblysynda 42 500 teńgeni 167 myń adam alǵan

KÓKShETAÝ. QazAqparat – Aqmola oblysynyń ákimi Ermek Marjyqpaev óńirde koronavırýs ınfektsııasynyń taralýymen kúres jáne karantın talaptarynyń saqtalý máselesine arnalǵan brıfıng ótkizdi, dep habarlaıdy QazAqparat tilshisi.

Aımaq basshysy óz sózinde, medıtsınalyq qural-jabdyqtar men atıseptıkter shyǵaryp, kópbalaly otbasylarǵa, múgedekterge jáne halyqtyń ózge de áleýmettik jaǵynan osal toptaryna kómek kórsetken iri óndiris oryndary men kásipkerlerge alǵys aıtty.

«167 myń aqmolalyq jalpy quny 7,1 mıllıard teńge bolatyn 42500 teńge kóleminde materıaldyq kómek aldy. Pandemııanyń taralýy kezinde turǵyndar men uıymdar úshin qajetti ónimderdi shyǵaratyn jańa óndiris oryndaryn ashqan kásiporyndarǵa erekshe rızashylyǵymdy bildiremin. Olardyń arasynda maska, medıtsınalyq quraldar jáne dezınfektsııalyq zattar shyǵaryp jatqan Kókshetaý qalasyndaǵy «Tynys» aktsıonerlik qoǵamy jáne turmystyq hımııa zaýyty bar.

Osy sátti paıdalana otyryp, qıyn ýaqytqa qaramaı kópbalaly otbasylarǵa, múgedekterge jáne halyqtyń ózge de áleýmettik jaǵynan osal toptaryna kómek kórsetken barlyq kásipkerlerge alǵys bildiremin. Bular – «Kusto Group» kompanııasy (Almaty), «Kókshetaý sút zaýyty» seriktestigi, Aizet Farm agroholdıngi (Ereımentaý aýdany), «TNK» (Jaqsy aýdany), «Astana Ónim» (Tselınograd aýdany) jáne «Úsh bulaq» (Aqkól aýdany) tárizdi kóptegen seriktestikter», - dedi Ermek Marjyqpaev.

Sonymen birge, aımaq basshysy áleýmettik mańyzy bar azyq-túlik taýarlarynyń baǵasyn qatań baqylaýda ekenin atap ótti.

«Birinshi kezekte qajetti ónimderdiń baǵasyn ósirmeý úshin aýqymdy jumystar júrgizildi. Baǵany negizsiz kóterý faktileri bolǵan, olarǵa ákimshilik sharalar qoldanyldy. Bul baǵyttaǵy jumystar jalǵasýda»,- dep tolyqtyrdy Ermek Marjyqpaev.