Aqmola oblysynda 3 jasar sábı tórtinshi qabattaǵy terezeden qulady

KÓKShETAÝ. QazAqparat – Aqmola oblysynda 3 jasar qyz bala tórtinshi qabattaǵy páterdiń terezesinen qulap ketti, dep habarlaıdy QazAqparat tilshisi oblystyq PD baspasóz qyzmetine silteme jasap.

Vedomstvonyń málimetinshe, jazataıym oqıǵa Qosshy qalasynda bolǵan. Bul týraly Qosshy qalalyq PB kezekshilik bólimine jedel járdem stantsııasynyń qyzmetkerleri habarlap aıtqan.

«Belgili bolǵandaı eresekterdiń qaraýynsyz qalǵan 2020 jylǵy qyz bala terezeden qulady. Saldarynan bala «jabyq bas mı jaraqaty, mıdyń shaıqalýy, qabyrǵalarynyń synýy» dıagnozymen Astana qalasynyń №2 qalalyq balalar aýrýhanasyna jatqyzyldy», - dedi vedomstvodan.

Osy rette, tártip saqshylary balalardyń terezeden qulap ketýine baılanysty jazataıym oqıǵalardyń aldyn alý úshin ata-analarǵa balalardy terezeleri ashyq bólmede qaraýsyz qaldyrmaýǵa, masalardyń torlaryn tıisti qorǵanyssyz paıdalanbaýǵa, terezelerdiń janyna jıhaz qoımaýǵa keńes beredi.

Aıta ketsek, budan buryn Kókshetaýda jasóspirim qyz kópqabatty turǵyn úıdiń shatyrynan sekirmek bolǵanyn jazǵan edik.