Aqmola oblysynda 3,5 myńǵa jaýyq muǵalim jańa baǵdarlama boıynsha biliktilikterin arttyrdy

KÓKShETAÝ. QazAqparat - Aqmola oblysynda 3 416 muǵalim bilim berýdiń jańa baǵdarlamasy boıynsha jumys isteý úshin biliktilikterin arttyrdy. Bul týraly búgin Kókshetaýda ótken ustazdardyń tamyz konferentsııasynda oblystyq bilim basqarmasy basshysynyń mindetin atqarýshy Valerıı Gamazov óz baıandamasynda atap ótti, dep habarlaıdy QazAqparat tilshisi.

«Qazaqstannyń úshinshi jańǵyrýy  - bilimniń úlesi» taqyrybynda baıandama jasaǵan basqarma basshysynyń sózinshe, oblysta bilim berýdiń zamanýı úlgisine birtindep kóshý baǵytynda aýqymdy jumystary júrgizilýde.
 

«BlimLand.kz» oqý portalyna óńirimizde 460 mektep qosyldy. Jańa oqý júıesin júıeli qamtamasyz etý úshin qajetti oqý quraldary satyp alyndy. Bul maqsatta jergilikti bıýdjetten 1,1 mıllıard teńge qarajat bólindi. Oǵan qosa, taǵy qosymsha 364 mıllıon teńge qarastyrylǵan. Osy kúni qarjy tolyǵymen ıgerilip, tıisti mekemelerge jetkizilip, tapsyryldy. Bıylǵy jyly qazaq tildi emes mektepterdiń 1-11 synyptaryna qazaq tilin deńgeılep oqytýdyń jańa ádistemesi ázirlendi. Sondyqtan, bıylǵy 1 qyrkúıekten bastap ázirlengen jańa ádisteme respýblıka boıynsha 150 mektep pılottyq rejımde synaqtan ótse, bizdiń oblysta 8 mektep atalmysh ádisteme boıynsha sabaq bere bastaıdy», - dedi basqarma basshysy.
 

Eske sala keteıik, sharaǵa Aqmola oblys ákiminiń orynbasary Aına Mysyrálimova, oblystyq máslıhattyń hatshysy Dýlat Nurmoldın, QR Bilim jáne ǵylym mınıstrliginiń ókili, zań qyzmeti jáne halyqaralyq yntymaqtastyq departamentiniń dırektory Nurseıit Baıjanov, oblystyq basqarmalardyń basshylary men aýdan, qala ákimderiniń orynbasarlary, aýdandyq, qalalyq bilim bólimderiniń jetekshileri, ardager ustazdar, bilim qyzmetkerleri men buqaralyq aqparat ókilderi qatysty.