Aqmola oblysynda 264 oqýshy «Altyn belgige» úmitker
Oblystyq bilim basqarmasy baspasóz qyzmetiniń málimetinshe, bıyl óńirde barlyǵy 4 986 oqýshy mektep bitirse, olardyń 3 649-y UBT tapsyrýǵa ótinish bildirip otyr. Al, 264 oqýshy «Altyn belgiden» úmitker. Bilim mazmunyn jańartý aıasynda jáne UBT formatyn jetildirý maqsatynda qorytyndy attestatsııa protsedýrasy bitirý emtıhany jáne JOO-na túsý emtıhandary bolyp bólindi. Memlekettik emtıhandar Qazaqstan Respýblıkasy Bilim jáne ǵylym mınıstrliginiń daıyndaǵan materıaldarynyń negizinde ótedi. 11 synyp túlekteriniń 100 paıyzy memlekettik bitirý emtıhandaryn 29 mamyrdan 9 maýsym aralyǵynda tapsyrady. Al, 2018 jyly UBT 20 maýsym men 1 shilde aralyǵynda ótedi.
«Oblys boıynsha barlyǵy 11 UBT tapsyrý pýnkti bar. Olardyń 3-eýi Astana qalasynda ornalasqan, onda Qorǵaljyn, Tselınograd, Arshaly aýdandarynyń túlekteri test tapsyrady», - dep kórsetilgen baspasóz habarlamasynda.
Sonymen qatar, oblysta jazǵy maýsym kezinde 17 saýyqtyrý ortalyǵy qyzmet isteıtin bolady. Jalpy, oblys boıynsha 1-10 synyptarda oqıtyn barlyǵy 111 700 oqýshy bolsa, onyń 99 paıyzyn osy ortalyqtarda demaldyrý josparlanýda.
Oǵan qosa, balalardyń jazǵy demalysyn ótkizý úshin mektep janynda 600-den astam lager uıymdastyrylady. Sondaı-aq, «Uly dala eli» jáne týrıstik ólketaný ekspedıtsııasy ótkizilse, 10 myń oqýshy oblystyń kıeli jerlerine saıahat jasaıtyn bolady.