Aqmola oblysynda 15 qulyndy bıeni aıdap áketken ury 7 jylǵa sottaldy

KÓKShETAÝ. QazAqparat – Aqmola oblysynyń Jarqaıyń aýdanynda jylqy urlaǵan malshy 7 jylǵa bas bostandyǵynan aıyryldy. Ol buǵan deıin de mal urlyǵy úshin sotty bolǵan, dep habarlaıdy QazAqparat tilshisi oblystyq sottyń baspasóz qyzmetine silteme jasap.

Vedomstvonyń málimetinshe, sottalýshy ózi malshy bola tura, ózge bir sharýashylyqtyń dalada jaıylyp júrgen 12 qulyny bar 15 jylqysyn aıdap áketken. Sóıtip, mal ıesine 10 mıllıon teńgeden astam shyǵyn keltirgen.

«Sot úkimimen sottalǵan adamǵa 7 jyl bas bostandyǵynan aıyrý jazasy taǵaıyndaldy. Jaza taǵaıyndaý kezinde sot jaýapkershilik pen jazany jeńildetetin jaǵdaılardy – kinásin moıyndaý, kinásin moıyndap kelý jáne shyn júrekten ókiný, jábirlenýshige keltirilgen zalaldy ishinara óteý, sottalýshynyń kámeletke tolmaǵan úsh balasy bolýy sııaqty jaǵdaılardy eskerdi. Bul rette sotta jábirlenýshi azamattyq talap qoıýdyń ótelmegen bóliginen bas tartty. Bul is boıynsha qatań jaza er adamnyń basqa sottyń 2023 jylǵy 15 aqpandaǵy basqa adamdarmen birge toptasyp 40 jylqy urlaǵany úshin 7 jylǵa bas bostandyǵynan aıyrylýyna baılanysty. Sondyqtan, osy is boıynsha sot 6 jyl jazany buryn taǵaıyndalǵan 7 jyl merzimge sińirý arqyly qosty», - dep túsindirdi vedomstvodan.

Sot úkimi zańdy kúshine engen joq.

Aıta ketsek, budan buryn Kókshetaýda kásipkerden aqsha talap etken tótenshe jaǵdaı qyzmetkerleri sottalǵanyn jazǵan edik.