Aqmola oblysynda 12 shetel azamatynyń zańsyz eńbek etkeni anyqtaldy
Aqmola oblystyq Polıtsııa departamenti baspasóz qyzmetiniń málimetinshe, 2023 jyldyń 19-25 maýsym aralyǵynda oblys aýmaǵynda «Kelimsek – 2023» jedel aldyn alý is-sharasy ótip jatyr. Aktsııa quqyqtyq tártip pen qoǵamdyq qaýipsizdikti kúsheıtý, kóshi-qon zańnamasy salasyndaǵy quqyq buzýshylyqtardy anyqtap, jolyn kesýge baǵyttalǵan.
«Sharanyń alǵashqy úsh kúninde kóshi-qon zańnamasynyń 218 buzý deregi anyqtalyp, 151 sheteldik ákimshilik jaýap tartyldy, onyń 148-i kórshi elderden kelgender. Sonymen birge, sheteldikterge baspana bergen jáne olardyń kelgendigin ishki ister organdaryna habarlamaǵan 51 qabyldaýshy jazaǵa tartyldy. Máselen, maýsymnyń 12-de Arshaly aýdany aýmaǵyndaǵy kásiporyndarda sheteldik 12 azamattyń zańsyz eńbek etkeni anyqtaldy», - dedi vedomstvodan.
PD baspasóz qyzmetinen atap ótkendeı, elimizdiń kóshi-qon zańnamasyn buzǵan sheteldikter QR Ákimshilik quqyqbuzýshylyq kodeksi 517-babynyń 5-bóligi boıynsha ákimshilik jaýapqa tartyldy. Sonymen qatar, oblys aýmaǵynda sheteldik jumys kúshi men eńbek ımmıgranttaryn zańsyz tartqany úshin 16 jumys berýshi jazalandy.
Aıta ketsek, budan buryn polıtsııaǵa para usynǵan júrgizýshi 465 myń teńge aıyppul arqalaǵanyn jazǵan edik.